‘लप्पन छप्पन’ सिक्वेल आउँदो शिवरात्रिमा, अफिसियल पोस्टर लन्च

मल्टिस्टारर फिल्म ‘लप्पन छप्पन’को दोस्रो श्रृंखलाले प्रदर्शन मिति तय गरेको छ । आगामी फागुन २७ गतेको शिवरात्रिमा फिल्म प्रदर्शन हुने जानकारी निर्माता कम्पनी गोल्डेन हिल्स पिक्चर्सले जनाएको छ ।

कोरोनाभाइरस महामारीको कारण रिलिज रोकिएको फिल्मले आउँदो वर्षलाई थिएटर रिलिजको घोषणा गरेको हो । यो एक्सन थ्रीलर फिल्ममा शिव श्रेष्ठ, सौगात मल्ल, अर्पण थापा, अनुपविक्रम शाही, गोविन्द शाही लगायतको अभिनय छ ।

मुकुन्द भट्टको निर्देशन रहेको फिल्ममा सुनिल निउरे र अमित शर्माको पटकथा, पुरुषोत्तम प्रधानको छायांकन, शम्भुजित बाँस्कोटा, राजेन्द्र भट्ट, दीपक आरजे र बुलेट फ्लोको संगीत, मिलन श्रेष्ठको सम्पादन रहेको छ ।

सुरज अधिकारी र प्रजापति शिवाकोटी कार्यकारी निर्माता, प्रकाश कुवँर, निर्मलकुमार मिश्र, चिजकुमार श्रेष्ठ, सुदीपचन्द्र र सन्तोषचन्द्र भक्रेल निर्माता छन् । फिल्मको अधिकांश छायांकन नेपालसहित अष्ट्रेलियामा गरिएको छ ।