नेपाल–अमेरिका फिल्म फेस्टिभलले माग्यो फिल्म, विश्वभरबाट आवेदन दिन सकिने

नेपाल–अमेरिका फिल्म फेस्टिभलको चौथो संस्करण आगामी असार ४ देखि ६ सम्म वासिङ्टनमा हुने भएको छ । फेस्टिभलका लागि आयोजकले विश्वभरबाट आवेदन खुलाएको छ ।

फेस्टिभलमा नेपाली फिचर, वृत्तचित्र, छोटा फिल्म, एनिमेसनलगायत विधाका फिल्म देखाइने भएको छ । नेपालबाहेक अमेरिका र दक्षिण एसियाली मुलुकका इन्डिपेन्डेन्ट फिल्मलाई उच्च महत्व दिने आयोजकले जनाएको छ ।

वासिङ्टन डीसी, मेरिल्यान्ड र भर्जिनियाका स्थानीय फिल्म निर्मातालाई प्रोत्साहन गर्न डीएमभी क्लोजअप समेत प्रदर्शन हुने भएको छ । ग्लोबल पिस फिल्म फेस्टिभल फ्लोरिडाको सहकार्यमा फिल्महरु समेत प्रदर्शन हुने भएका छन् ।

आवेदन परेकामध्येबाट उत्कृष्ट हुने फिल्मलाई पुरस्कृत गरिने भएको छ । फेस्टिभल अवधlमा फिल्म संस्कृति र सूचनाप्रविधिबारे प्यानल छलफल समेत हुने भएको छ । फिल्म प्रदर्शनपछि निर्माता, कलाकार एवं निर्देशकसँग छलफल चलाइने भएको छ ।

अमेरिकाको मेरिल्यान्ड राज्यमा स्थापित गैरनाफामूलक संस्था नेपाल–अमेरिका फिल्म सोसाइटीले सन् २०१७ देखि महोत्सव आयोजना गर्दै आएको छ । कोरोनाभाइरस महामारीले गत वर्षको संस्करण स्थगित भएको थियो ।