नेकपामा विवाद चर्किएका बेला विपक्षीको पनि भेटघाट

काठमाडौं । सत्तारुढ नेपाल कम्युनिष्ट पार्टी (नेकपा) भित्र चर्किएको विवाद समाधान गर्न सघन भेटघाट भइरहेका बेला विपक्षी दलहरुले पनि भेटघाट बढाएका छन्।

प्रमुख प्रतिपक्षी नेपाली कांग्रेसका सभापति शेरबहादुर देउवालाई भेट्न अर्को विपक्षी दल जनता समाजवादी पार्टीका नेताहरु बूढानीलकण्ठ पुगेका छन्।

देउवाका स्वकीय सचिव भाणु देउवाले जसपाका अध्यक्ष महन्थ ठाकुर र नेताहरु डा।बाबुराम भट्टराई र राजेन्द्र महतो आएको र अहिले कुराकानी भइरहेको बताए।

सरकारले संवैधानिक परिषद् सम्बन्धी अध्यादेश ल्याएपछि सत्तारुढ दल नेकपा भित्र विवाद चर्किएको छ। प्रमुख प्रतिपक्षी नेपाली कांग्रेसले अध्यादेश फिर्ता हुनुपर्ने माग गरेको छ।

सरकारले उक्त अध्यादेश फिर्ता नलिएको खण्डमा विपक्षी दलहरुले अपनाउने रणनीति सम्बन्धमा छलफल गर्न विपक्षीहरुको भेटघाट भएको ठानिएको छ।