बालुवाटारमा ओली र प्रचण्डबीच भेटवार्ता

काठमाडौं। पार्टी विवाद समाधान हुनुको साटो झन् बढी रहेका बेला सत्तारुढ नेपाल कम्युनिष्ट पाटी (नेकपा)का अध्यक्षद्वबीच भेटवार्ता भएको छ ।

प्रधानमन्त्री एवम् अध्यक्ष केपी शर्मा ओलीलाई भेट्न अर्का अध्यक्ष पुष्पकमल दाहाल ‘प्रचण्ड’ शुक्रबार साँझ बालुटार गएका थिए।

दिउँसो पेरिसडाँडामा आफू पक्षका प्रदेश १ का जिल्ला अध्यक्ष र सचिवहरुको भेला सकेर उनी साँझ प्रधानमन्त्री एवम् अध्यक्ष ओलीसँग भेटघाट गर्न गएका हुन् । ओलीलाई भेट्न जानुअघि प्रचण्ड र अर्का नेता माधवकुमार नेपालले नेपाली कांग्रेसका नेता रामचन्द्र पौडेलसँग पनि भेटवार्ता गरेका थिए।

प्रचण्डका प्रेस सल्लाहकार विष्णु सापकोटाले दुई अध्यक्षबीच पार्टीमा देखएको समस्यामा केन्द्रित भएर छलफल भए पनि कुनै ठोस सहमति नभएको बताए।

बुधबार बसेको स्थायी कमिटी बैठकले संवैधानिक परिषद्सम्बन्धी सरकारले ल्याएको आध्यादेश र प्रचण्ड–माधव पक्षले संसद् आह्वान गर्दै शीतल निवासमा बुझाएको हस्ताक्षर फिर्ता लिने निर्णय गरेको थियो ।

तर, उक्त निर्णयलाई नेकपा भित्रका दुवै पक्षले नमानेको जस्तो देखिएको छ। सरकारले पनि अहिलेसम्म अध्यादेश फिर्ता लिएको छैन् भने प्रचण्ड–माधव नेपाल पक्षले शुक्रबार मात्रै गुटको भेला गरेको छ ।