कांग्रेस प्रवक्ता टेलिभिजन कार्यक्रमका होस्ट !

कांग्रेस प्रवक्ता विश्वप्रकाश शर्मा टेलिभिजन कार्यक्रमका होस्ट बन्ने भएका छन् । उनले संचालन गर्ने कार्यक्रम कान्तिपुर टेलिभिजनबाट माघ ७ गतेदेखि प्रसारण हुने भएको छ ।

सामाजिक मुद्दाको उठान गर्ने उक्त कार्यक्रमलाई अमनप्रताप अधिकारीले निर्देशन गर्ने भएका छन् । कार्यक्रमको नाम राखिएको छ –ऐना । विहिबार राजधानीमा आयोजित प्रेसमिटमा कार्यक्रमको औपचारिक घोषणा गरियो ।

२६ श्रृंखलासम्म प्रसारण हुने कार्यक्रमलाई होराइजन मिडियाले निर्माण गर्ने भएको छ । प्रेसमिटमा बोल्दै निर्देशक अधिकारीले सामाजिक र मानवीय मुद्दालाई केन्द्रमा राखेर कार्यक्रम गरिने जनाए ।

निर्माता कम्पनी होराइजन मिडियाका अनुसार स्थलगत अध्ययन र अवलोकन गरेर कार्यक्रम उत्पादन गरिनेछ । सरोकारवाला निकायसँग अन्तर्वार्तामूलक ढंगले कार्यक्रम चलाइने भएको छ । उक्त अवसरमा बोल्दै संचालक शर्माले टेलिभिजनमा काम गर्न लागेकोमा उत्साह व्यक्त गरे ।