सोसल मिडियामा सक्रियता बढाउँदै प्रधानमन्त्री देउवा

काठमाडौ । प्रधानमन्त्री शेरबहादुर देउवाले सामाजिक सञ्जालहरूमा आफ्नो सक्रियता बढाएका छन् । यसअघि फेसबुक र ट्वीटरमा मात्रै सक्रिय देउवा प्रधानमन्त्री भएसँगै भाइबर ग्रुप र इन्स्टाग्राममा पनि सक्रिय देखिएका छन् । देउवाको सामाजिक सञ्जाल सञ्चालन र व्यवस्थापनमा सचिवालयसँगै छोरा जयवीरसिंह देउवा पनि सक्रिय रहेका छन् ।

भाइबरमा रहेको ग्रुप अन्तरक्रियात्मक छैन । यद्यपि त्यसमा प्रधानमन्त्री देउवाका गतिविधि, तस्बिर र भिडियोहरू अपलोड हुने गरेको छ । त्यस्तै फेसबुक र ट्वीटमार्फत प्रधानमन्त्रीका गतिविधि, धारणाहरू सार्वजनिक हुने गरेका छन् ।

‘हामीले सामाजिक सञ्जालमार्फत प्रधानमन्त्रीका हालका गतिविधिमात्रै होइन, विगतमा उहाँको नेतृत्वमा भएका सफल कामहरूको प्रचारसमेत गरिरहेका छौं’, सचिवालय स्रोतले नेपाल प्रेससँग भन्यो, ‘केहीदिनमै टिकटकबाट पनि प्रधानमन्त्री देउवाका नयाँ पुराना भिडियो सामाग्रीहरू सार्वजनिक गरिनेछ ।’