नितेशलाई युवा संघको चेतावनी- आफैंले आफैंलाई नेता घोषणा गर्ने लज्जास्पद हर्कत क्षम्य हुँदैन (भिडिओ)

काठमाडौं । नेकपा एकीकृत समाजवादीनिकट युवा संघ नेपालले सहसंयोजक नितेश पौडेलले विधि विधान र पद्धतिभन्दा बाहिर गएर अराजक गतिविधि गरेको निष्कर्ष निकालेको छ ।

सहसंयोजक पौडेलले समानान्तर कमिटी घोषणा गरेपछि संस्थापन पक्षले पत्रकार सम्मेलन गरेर संगठनमा व्यक्तिवाद प्रकट भएको युवा संघ नेपालका कार्यालय सदस्य धर्म शाहीले बताए ।

उनले भने, ‘सम्मेलन गर्न आफ्नै विधि र व्यवस्था छ । कमिटी, संगठन नेतृत्व छ । सबै विषयलाई लत्याएर अवैधानिक भेलालाई रोक्न संगठन र पार्टीले गरेको निर्णयलाई समेत अवमूल्यन गरेर आफैंले आफैंलाई नेता घोषणा गर्ने लज्जास्पद हर्कत क्षम्य हुँदैन ।’

संगठनविपरीत गतिविधि गरेपछि पौडेलसहित कार्यालय सदस्यद्वय रोशन थापा र फूर्वा लामालाई संगठनको सम्पूर्ण जिम्मेवारीबाट निष्कासन गरेर पार्टीलाई जानकारी गराइसकेको बताए । पार्टीले पनि अराजकतालाई छुट नदिने उनको भनाइ थियो ।

मातृपार्टी महाधिवेशनमा होमिएको बेलामा युवा संघका संयोजक कृष्ण विक र सहसंयोजक पौडेल नेतृत्वका विषयमा विवाद समानान्तर कमिटीसम्म पुगेको हो । पौडेल पार्टी अध्यक्ष माधव नेपालका भान्जा हुन् भने विक सम्मानित नेता झलनाथ खनालनिकट हुन् ।