बंगलादेशलाई हराएपछि अमेरिकाका बलर अली खानले भने- बाटोमा आउने जोसुकैलाई खान सक्छौं

काठमाडौं । अमेरिकाका फास्ट बलर अली खानले बंगलादेशविरुद्धको टी-२० सिरिज जित्नु कुनै आश्यर्यजनक नभएको बताएका छन् । उनले टी-२० विश्वकपमा अमेरिकाले बलियो टीमलाई समेत अप्ठ्यारो पार्ने विश्वास व्यक्त गरे ।

‘हामी (संयुक्त राज्य अमेरिका) भोकाएका छौं, र हाम्रो बाटोमा आउने जो कोहीलाई खाने प्रयास गर्नेछौं,’ खानले भने।

उनले थपे,‘यो समय हो जहाँ हामी केहि परिवर्तन गर्न र समायोजन गर्न सक्छौं। टोली सन्तुलित देखिन्छ, र सबै केटाहरू भोकाएका छन्। म विश्वस्त छु कि संयुक्त राज्य अमेरिकाले विश्वकपमा केही अप्ठ्यारो गर्नेछ।’

लगातार दुई खेलमा जित निकाल्दै अमेरिकाले बंगलादेशविरुद्धको ३ खेलको टी-२० सिरिज आफ्नो पक्षमा पारेको थियो । दोस्रो खेलमा अमेरिकाले ६ रनले पराजित गर्दा खान प्लेयर अफ द म्याच बनेका थिए ।

अवसर दिएमा आफुहरुसँग प्रतिभा, सीप र क्षमता भएको खान बताउँछन् । ‘हामीले अमेरिकालाई विश्व क्रिकेटको नक्सामा राख्नुपर्छ। कहिलेकाहीँ जब तपाईं ठूलो पक्षविरुद्ध जित्नुहुन्छ, तिनीहरू भन्छन् यो क्षणिक हो। तर, उनीहरूलाई दुईपटक हराई सिरिज जित्नु क्षणिक होइन। अवसर दिएमा हामीसँग प्रतिभा, सीप र क्षमता छ,’ उनले भनेका छन्  ।