कांग्रेसको चुनौती- गृहमन्त्रीले लगाएका आरोप छानबिन गरी प्रमाणित गरियोस् (भिडिओ)

काठमाडौं । प्रमुख प्रतिपक्ष नेपाली कांग्रेसले सहकारी ठगी प्रकरणमा गृहमन्त्री रवि लामिछानेमाथि संसदीय छानबिन समितिको पूर्वअडानमा दृढ रहेको बताएको छ ।

संसदीय दलको निर्णय सुनाउँदै कांग्रेसका प्रमुख सचेतक रमेश लेखकले सहकारी ठगीमा गृहमन्त्री लामिछानेको संलग्नताको प्रष्ट तथ्य देखिएको दोहोर्‍याए ।

‘समाचारमा प्रेषित होइन । प्रहरीमा उजुरी भएको प्रमाण छन् । रवि लामिछानेमाथि सहकारी ठगीमा छानबिन हुनुपर्ने पूर्ववर्ति निर्णयमा हामी दृढ छौं । हाम्रो बटमलाइन त्यहि हो’, उनले भने ।

हिजो गृहमन्त्री लामिछाने असभ्य, असत्य, भ्रामक, कपोकल्पित र हिंस्रक ढंगले सदनमा प्रस्तुत भएको उनले टिप्पणी गरे ।

आफूमाथि लागेको अभियोगबाट भाग्ने प्रयास गरेर अरुलाई झुटा आरोप लगाएको लेखकको भनाइ छ । उनले कांग्रेस र नेतालाई लक्षित गरी लगाइएका आरोपमा छानबिन गरेर प्रमाणित गर्न चुनौतीसमेत दिए ।

‘सदनमा कांग्रेस र नेता लक्षित आरोप लगाइएका छन् । अनुसन्धान, छानबिन गरेर प्रमाणित गर्न त्यसका लागि खुल्ला छौं । उपप्रधान तथा गृहजस्तो जिम्मेवार ठाउँमा बसेकाले अरुलाई प्रश्न सोध्ने होइन आफूमाथि उठेका प्रश्नको जवफ दिनुपर्छ ।’

गृहमन्त्रीले बोलेको कुरालाई लिएर प्रधानमन्त्रीको ध्यानाकर्षण गराउने पनि लेखकले बताए । रविमाथि संसदीय छानबिन समितिको सुनिश्चित नभएसम्म सदन चल्न नदिने उनको प्रष्टोक्ति थियो ।

‘समिति बनाएर गृहमन्त्रीमाथि छानबिनको सुनिश्चित गर्नुस् राति १२ बजेसम्म सदन चलाउन र कार्यसूचीमा प्रवेश गर्न दिन तयार छौं’, लेखकले सुनाए ।