पूर्वकर्मचारी हरिवंशलाई निम्त्याएर रत्नराज्य स्कुलले मनायो ६३ औं वार्षिकोत्सव

काठमाडौं । काठमाडौंको मध्य बानेश्वरस्थित रत्नराज्य माध्यमिक विद्यालयले आज आफ्नो ६३ औं वार्षिकोत्सव मनाएको छ । समारोहमा वरिष्ठ हास्य कलाकार हरिवंश आचार्यलाई प्रमुख अतिथिका रुपमा निम्त्याइएको थियो ।

उक्त अवसरमा आचार्यले वार्षिकोत्सवमा भाग लिन पाएकोमा खुशी व्यक्त गरे । आफू विद्यालयको भूतपूर्व कर्मचारी रहेको पनि उनले स्मरण गरे ।

आचार्यले भने, ‘मैले आज यो स्कुलमामा मुख्य अतिथि भएर आउन पाउँछु भन्ने कल्पना गरेकै थिएनँ । म यो स्कुलको एउटा एकदमै साधारण कर्मचारी थिएँ २०३२ सालमा । मेरो पद थियो मुखिया । मेरो हाकिम होमबहादुर केसी खरदार हुनुहुन्थ्यो । हामी यहाँ फिस बुझ्ने काम गर्थ्यौं । त्यही मान्छे आज यो गरिमामय समारोहमा प्रमुख अतिथि भएर उपस्थित हुन पाउँदा मेरो मन कति गदगद भएको होला ?’

वार्षिकोत्सव समारोहमा विद्यार्थीहरुलाई पुरस्कार वितरण तथा शिक्षकशिक्षिकाहरुलाई सम्मान पनि गरिएको थियो । विद्यार्थीहरुले आआफ्नो कला प्रस्तुत गरेका थिए ।