इलाम-२ बाट ज्ञानेन्द्र शाहीको भविष्यवाणी: राप्रपाले ७ हजार भोट कटाउँछ, रास्वपा पाँचौं हुने भयो

काठमाडौं । इलाम-२ को उपनिर्वाचनमा राष्ट्रिय प्रजातन्त्र पार्टी (राप्रपा)ले आफ्नो चुनावी कमाण्डर बनाएर पठाएको छ सांसद तथा प्रवक्ता ज्ञानेन्द्र शाहीलाई । एक सातादेखि उनी इलाममा खटिएर पार्टीका उम्मेदवार लक्ष्मी गुरुङको पक्षमा भोट मागिरहेका छन् र भाषण गरिरहेका छन् ।

नेपाल प्रेससँग फोन सम्पर्क हुँदा शाही चुलाचुलीतर्फ जाँदै थिए । उनले आफ्नो पार्टीले यस पटकको चुनावमा नसोचेको भोट ल्याउने आँकलन सुनाए । उस्तै परे राप्रपाले चुनावै जित्न पनि सक्ने उनको महत्वाकांक्षी विश्लेषण छ । यद्यपि, अहिलेकै अवस्थामा मुख्य प्रतिस्पर्धा कांग्रेस र एमालेबीच नै रहेको उनले स्वीकार गरे ।

राप्रपाले अघिल्लो संसदीय चुनावमा मोटामोटी ५०० मात्र भोट ल्याएको थियो । त्यसैले यो उपचुनावमा पनि राप्रपा उम्मेदवारलाई गम्भीर प्रत्याशी ठानिएको छैन । तर, ज्ञानेन्द्र शाही खटिएपछि पार्टी पंक्तिमा केही न केही रक्तसञ्चार भएकै छ । अन्य पार्टीका मानिसहरु पनि उनलाई चाख मानेर सुनिरहेका छन् । आफूले पाइरहेको रेस्पोन्सबाट प्रफुल्ल देखिन्छन् शाही ।

‘इलाममा हाम्रो पार्टी शून्य बराबर थियो, तर अहिले हामीले निकै राम्रो माहोल बनाइसकेका छौं’, उनले भने, ‘पुराना कार्यकर्ताहरु संगठित भए । नयाँ मतदाताहरु उल्लेख्य संख्यामा राप्रपाको एजेन्डामा आकर्षित भइरहेको पाइयो ।’

राप्रपाले ७ देखि १० हजारको बीचमा भोट ल्याउने आँकलन शाहीले गरेका छन् । भोलि चुलाचुलीमा हुने दुइटा कार्यक्रम राम्रो भएको खण्डमा राप्रपाले जित्न पनि सक्ने दाबीसमेत उनले गर्न भ्याए ।

‘चुलाचुलीमा १३ हजार भोट छ । त्यहाँको १० देखि २० प्रतिशत भोटमात्रै तान्यौं भने पनि चुनाव हामीले जित्न सक्छौं’, उनले भने ।

रवि लामिछानेको रास्वपाको भने विजोक देखिएको शाही बताउँछन् ।

‘घन्टीको चर्चा त टेलिभिजन र सामाजिक सञ्जालमा मात्रै हो । यहाँ उनीहरुको विजोक देखियो । घरदैलोमा हिँड्ने कार्यकर्ता पनि काठमाडौंबाट ओसारिरहेका रहेछन् । यहाँ त उनीहरुको संगठन शून्य जस्तै रहेछ’, उनले भने ।

त्यसो त केही दिनदेखि रास्वपा र रवि लामिछानेको कटु आलोचक बनिरहेका छन् ज्ञानेन्द्र शाही । आफ्ना हरेक भाषण र अन्तर्वार्तामा उनी रास्वपामाथि खनिन्छन् । भोट माग्ने क्रममा पनि उनले ‘बरु मुढालाई दिनुस्, तर घन्टीलाई नदिनुस् भनेका थिए ।

तपाईं रास्वपाप्रति यति धेरै पूर्वाग्रही किन हुनुभयो भन्ने प्रश्नमा शाहीले जवाफ दिए, ‘म पूर्वाग्रही किन हुने ? भोलि चुनावको रिजल्टले देखाइहाल्छ नि ? कस्ता मतदाताले घन्टीलाई भोट हाल्छन् भन्नुस् त । पहिचानवादीले मुढामा हालिहाल्छन् । पहिचानविरोधीले कांग्रेस-एमालेलाई हाल्छन् । अब त बाहुन क्षेत्री कसैले पनि घन्टीलाई नहाल्ने भए ?’

– किन र ?

मिलन लिम्बूले हिजो बाहुन/क्षेत्रीलाई भेटे …. भन्दै हिँडेका रहेछन् नि त ! हिजो एउटा कार्यक्रममै उनीमाथि त्यो प्रश्न सोधियो । उनले होइन भन्न सकेनन् । यो थाहा पाएपछि बाहुन-क्षेत्रीले भोट कसरी दिन्छन् ? रास्वपालाई भोट दिन ठीक्क परेकाहरु पनि राप्रपातिर मोडिएका छन् ।

– अनि तपाईंले आफ्नो पार्टीलाई भोट माग्न छोडेर घन्टीलाई भोट नदिनुस् भन्दै हिँड्नुपर्ने अवस्था चाहिँ किन आयो ?

मैले त आफ्नै पार्टीलाई भोट दिनुस् भन्ने हो नि ! त्यसैका लागि त म यहाँ छु । मैले के भनेको थिएँ भने यदि तपाईं राष्ट्रियताको पक्षधर, राजसंस्था र हिन्दू राष्ट्र चाहनुहुन्छ भने राप्रपालाई भोट दिनुस्, होइन भने बरु मुढालाई दिनुस् तर, घन्टीलाई नदिनुस् । कुनै एजेन्डा नभएका र भोटका लागि आफ्नो सिद्धान्त नै बेच्नेलाई किन भोट दिनुहुन्छ भनेको हो । असली पहिचानवादी त मुढा हो नि !

– रास्वपाले त चुनाव नै जित्ने दाबी गरिरहेको छ नि ?

त्यो हावादारी कुरा हो । रास्वपाले नेपालभरिका कार्यकर्ता इलाममा उतारेको छ, तर इलामका कार्यकर्ता छँदै छैनन् । घरदैलो गर्ने मान्छे पनि रहेनछन् बिचरा । दुई जना मान्छे कांग्रेसबाट आएका रहेछन् । तर, उनीहरु पनि घरदैलोमा हिँड्नुको साटो तोसिमा कार्की, स्वर्णिम वाग्लेलाई भात खुवाउने काम गरिरहेका छन् । घरदैलोमा हिँड्नेहरु त सबै बाहिरबाट आएका हुन् ।

म भर्खरै सरकारको गुप्चतर विभागका अधिकारीसँग भेटेर निस्किएको हो । उसले जित्न चाहिँ एमालेले जित्छ भनिरहेको छ । अहिलेसम्म कांग्रेसभन्दा एमाले हजार-१२ सय भोटले अगाडि छ तर, मतदानको दिनसम्म जे पनि हुनसक्छ भन्ने उसको भनाइ थियो । कांग्रेसले आफ्नो आन्तरिक समस्या मिलायो भने कांग्रेसले पनि जित्नसक्छ चुनाव ।

– कस्तो आन्तरिक समस्या छ र ?

उसका कार्यकर्ताहरु धेरै रुष्ट छन् रे ! त्यो मिलायो भने कांग्रेसको सम्भावना बलियो देखिन्छ । अहिलेको चुनावमा १० देखि १२ हजार भोट ल्याउनेले जित्छ ।

– तेस्रो स्थानमा को आउला त ?

तेस्रो स्थानका लागि मुढा र राप्रपाबीच प्रतिस्पर्धा हुने देखियो । रास्वपा पनि पछिपछि थियो, तर हिजो मिलन लिम्बूको त्यो भिडियो आइसकेपछि रास्वपाको कम्तीमा पनि ४ हजार भोट घटेको छ । तर, जे भए पनि मुढा, राप्रपा र घन्टी तेस्रो स्थानको प्रतिस्पर्धामा छन् । हामीले आफ्नो क्याम्पेन अलिकति व्यापक बनाइदियौं भने रास्वपा हामीभन्दा १५ सय, दुई हजार भोटले पछि पर्छ । होइन भने राप्रपाको हाराहारी आउनसक्छ ।

– तपाईंले भने जस्तो राप्रपाले ५०० भोटबाट १० हजार पुर्‍याउने आधार के त ?

जुम्लामा पनि त त्यस्तै थियो । मैले कसरी चुनाव जितें ? जनमत भनेको स्थायी रुपमा कसैको पोल्टामा हुँदैन । जनता गणतन्त्रबाट अघाइसकेका छन् । राजावादी शक्तिलाई भोट दिने मनस्थितिमा छन् । त्यही नै मुख्य आधार हो ।

यदि रास्वपाले सही उम्मेदवार उठाएको भए हामीलाई आउन सक्ने भोट उसलाई जाने रहेछ । यदि डा. महेन्द्र थापालाई टिकट दिएको भए राम्रै सम्भावना रहेछ । तर, उम्मेदवार छनोटमा नै ब्लन्डर गर्‍यो । रास्वपाको विजोक हुनेवाला छ । गृहमन्त्रीको आमसभा हेर्नुस् न । उहाँ राँकेमा जानुभयो र २५ जनाको बीचमा भाषण गरेर फर्किनुभयो । जबकि म त्यही ठाउँमा भाषण गर्दा सय-डेढ सय थिए ।