नरबहादुर कर्माचार्य देशकै राजनीतिक अभिभावक : प्रधानमन्त्री

काठमाडौं । प्रधानमन्त्री पुष्पकमल दाहाल ‘प्रचण्ड’ ले देश र जनताको पक्षमा निरन्तर क्रियाशील नरबहादुर कर्माचार्य देशकै राजनीतिक अभिभावक भएको बताएका छन् ।

‘नरबहादुर कर्माचार्य स्मृति प्रतिष्ठान’ ले आज आयोजना गरेको कार्यक्रमलाई सम्बोधन गर्दै दाहालले नेता कर्माचार्य क्रान्ति र आन्दोलनका निम्ति सकारात्मक वातावरण बनाउने राजनीतिक अभिभावक भएको बताएका हुन् ।

उनको नाममा स्मृति प्रतिष्ठान र सम्मान र सम्झनामा ललितपुरको महालक्ष्मीस्थानमा ‘नरबहादुर कर्माचार्य स्मृति बहुप्राविधिक शिक्षालय’ स्थापना भएको उनले स्मरण गरे ।

दिवङ्गत कर्माचार्यले २००५ सालदेखि प्रजातन्त्र संघमा आवद्ध भएर राणाविरोधी आन्दोलन र मजदुर आन्दोलनमा सशक्त भूमिका निर्वाह गरेको उल्लेख गर्दै प्रधानमन्त्री दाहालले नेपाल कम्युनिष्ट पार्टी स्थापना गर्ने चारजना संस्थापकमध्ये उनी एक भएको बताए ।

मजदुर आन्दोलनको उत्थानका निम्ति निरन्तर सक्रिय कम्युनिस्ट नेता कर्माचार्यले पार्टी र जनप्रतिनिधिको भूमिका सँगसँगै पूरा गरेको प्रचण्डले बताए । निष्कलङ्कित, विवादरहित, सादगी र मिलनसार नेता कर्माचार्य समन्वय तथा समझदारीका लागि सदा प्रयत्नशील रहेको उल्लेख गर्दै प्रधानमन्त्री दाहालले वामपन्थी एकता क्रान्तिको निरन्तरता र निष्ठालाई जीवन्त राख्ने उदाहरण र प्रेरणाको रूपमा लिन सकिने बताए ।