प्रशान्त तामाङको ‘सारंग’ मा ऋचा

काठमाडौं । बाल मनोबिज्ञान, बालअधिकार तथा धनी र गरिब परिवारबीचको खाड्लको विषयमा ‘सारंग’ फिल्म निर्माण हुने भएको छ । राजधानीमा प्रेसमिट आयोजना गरि फिल्मबारे जानकारी दिइएको हो ।

कोरियोग्राफरको रुपमा समेत परिचीत निर्देशक प्रशान्त तामाङको लेखन तथा निर्देशनमा बन्ने फिल्ममा ऋचा शर्मा,उत्पल झा,समीर मणि दीक्षित, सुरज तमु,मणि के राई, अनिषा न्यौपाने, निरज ब्ल्याक, दीपीका थापा, सुमन सागर जंग केसीका साथमा बाल कलाकारद्वय सम्राट थापा र आदित्य कार्कीले अभिनय गर्दैछन् ।

कार्यक्रमका प्रमुख आथिति कान्जिरोवा नेसनल स्कुलका प्रिन्सिपल रञ्जीत थापाले ‘सारंग’ ले आममानिसमा मनोरञ्जनका साथै यथेष्ट सूचना प्रदान गर्ने बिश्वास ब्यक्त गर्दै अभिभावकहरुलाई भबिष्यका कर्णाधार बालबालिकाप्रति गर्नुपर्ने ब्यबहार तथा जिम्मेवारी बोध गराउन सफल हुने धारणा व्यक्त गरे ।

निर्देशक प्रशान्तले आफूले समाज, घरपरिवारदेखि भोगी आएका विषयलाई पर्दामा उतार्न लागेको बताउँदै ‘सारंग’ को आगामी आइतबार अर्थात २ वैशाखबाट छायांकन सुरु हुने जानकारी दिए ।

अभिनेत्री ऋचाले आफूलाई ‘सारंग’ को स्क्रिप्ट निकै मन परेको बताउँदै यस प्रकारको फिल्मले समाजलाई सही दिशामा निर्देश गर्न अहम् भूमिका निर्वाह गर्ने राय राखिन् । उनले यो फिल्ममा आफूलाई दर्शकले विगतका आफ्ना फिल्महरु भन्दा फरक भूमिकामा देख्न पाउने दाबी गरिन् ।

दर्शन बुद्ध फिल्मस्को ब्यानरमा निर्माण हुने फिल्मको डिओपीमा गोपाल राय छन् । मित्र ध्वज गुरुङले सम्पादन गर्ने फिल्मका गीत डिपी खनालले लेखेका हुन् भने संगीत शंकर थापा ‘स्माइल’ को छ । फिल्म बाल दिवसको अबसर पारेर सार्वजनीक प्रदर्शन गर्ने योजना निर्माण पक्षको छ ।