भारतीय र्‍यापर बादशाह यमबुद्ध र भिटेनका फ्यान, नेपाली संगीतबारे के भने ?

काठमाडौं । चर्चित भारतीय र्‍यापर वादशाहले एक पोडकास्टमा नेपाली संगीत जबरदस्त भएको बताएका छन् । अनट्रिगर्ड विथ अमिनजाज नामक युट्युब च्यानलमा सार्वजनिक पोडकास्टमा नेपाली संगीत किलर रहेको बताएका हुन् ।

भर्खरै नेपाली गायिका प्रजिनासँग एल्बम ‘एक था राजा’को ‘कृष्ण’ गीतमा सहकार्य गरेका वादशाहले प्रजिनाबारे भनेका छन्, ‘मलाई कृष्ण गीतका लागि नेपाली चाहिएको थियो । सो हामीले नेपालकी प्रजिनालाई सम्पर्क गर्यौं । उनले जबरजस्त गाइन् । उनको साथ काम गर्न मजा आयो । मलाई नेपाल मन पर्छ । नेपाल सुन्दर ठाउँ हो ।’ उनले नेपालको हिमालहरुबीचमा रहेको सहर सधैं याद आउने समेत बताए ।

बादशाहले नेपाली दर्शक क्रेजी भएको भन्दै आफ्नो गीतहरु सार्वजनिक हुँदा नेपालमा ट्रेण्डिङमा आउने भन्दै खुसी समेत व्यक्त गरे । कुराकानीका क्रममा पोडकास्ट संचालकले सोधे, ‘फिल्म, संगीत भारतबाट निर्यात हुन्छ । तर मलाई थाहा छैन, उनीहरुको आफ्नै म्युजिक कस्तो हुन्छ । मलाई लाग्छ, उनीहरुको आफ्नै म्युजिक छ । नेपाल जाँदा क्याफे र रेस्टुरेन्टमा नेपाली म्युजिक बजेको थियो ।’

यसपछि बादशाह भन्छन्, ‘ब्रो नेपाली संगीत किलर छ । उनीहरुको हिपहप गायन जबरदस्त छ । तिमीले यमबुद्ध सुनेको छौ ? ऊ र्‍याप गाउने गर्थ्यो । तर, बित्यो । अहिले पनि एक दुईजना छन् । एउटा भिटेन हो यासद । उनीहरु त्यही र्‍याप गाउँछन्, जहाँ उनीहरुले बाँचेको कथा हुन्छ । तर, भिटेनको गीतमा अलिकति जेलनेलको सिनहरु प्राय आइरहेका हुन्छन्, यसबारे चाहीँ मलाई थाहा छैन ।’

बादशाहले नेपाल र बंगलादेशमा धेरै नै माया मिल्ने समेत बताए । एयरपोर्टमा ल्याण्ड हुनसाथ म माया पाउँछु । तर, भारतमा त्यस्तो हुँदैन ।