मानव सेवा आश्रमको पूर्वाधार सहयोगार्थ बेलायतमा सांगीतिक कार्यक्रम गर्दै आनी

काठमाडौं । ‘फूलको आँखामा फूलै संसार’ बोलको चर्चित गीतकी गायिका आनी छोइङ डोल्मा बेलायतमा गुञ्जिने भएकी छिन् । आउँदो मे ५ मा क्याम्बर्लि सरेस्थित लेकसाइड इन्टरनेशनल कन्ट्री पार्कको हलमा आनीको विशेष सांगीतिक प्रस्तुतिको तय भएको छ ।

‘इनर मेलोडि फर इनर पिस’ नाम दिइएको कार्यक्रम मानव सेवा आश्रम नेपालको भवन निर्माणको सहयोगार्थ गर्न लागिएको हो । पछिल्ला दिनमा गायनसागै सामाजिक कार्यमा व्यस्त आनीले कार्यक्रममा आफ्ना चर्चित गीत पस्किने बताइएको छ । मानवताको संरक्षण र प्रवर्द्धनमा दशकदेखि गतिविधि गर्दै आएको मानव सेवा आश्रमले २०८२ सालसम्ममा सहयोगापेक्षि सडक आश्रित मानवमुक्त नेपाल बनाउने लक्ष्य लिएको छ । सोही लक्ष्य पूरा गर्न आयोजना गर्न लागिएको सांगीतिक कार्यक्रमबाट एक करोड ६८ लाख रूपैयाँ संकलन गर्ने लक्ष्य आयोजकको छ ।

उक्त कार्यक्रममा नेपाली दर्शकसँगै आध्यात्मिक तथा बौद्ध धर्ममा आस्था राख्ने बेलायत तथा युरोपका गरी १५ सय दर्शक सहभागी हुने आयोजकको अपेक्षा छ । कार्यक्रम विशुद्ध आध्यात्मिक हुने भन्दै मदिरा र मासु बर्जित गरिएको छ ।

सांगीतिक कार्यक्रमको मुख्य अतिथिमा बेलायतका लगि नेपाली राजदूत ज्ञानचन्द्र आचार्य रहने छन् । कार्यक्रम सफल बनाउन संस्थाका संयोजक सुनिलबाबु खड्काको संयोजकत्वमा ३१ सदस्यीय मूल समितिसहित उपसमितिहरू बनाइएको छ ।

मानव सेवा आश्रमले सातवटै प्रदेशका १९ जिल्लामा २४ सेवा केन्द्र सञ्चालन गरिरहेको छ । हालसम्म १० हजारभन्दा बढी मानसिक र शारिरीकरूपमा अशक्त व्यक्तिलाई आश्रय दिनुका साथै परिवारबाट विच्छेद भएका ३ हजार १ सय ८० जनाको पुनर्मिलन गराइएको छ ।