माओवादीले दियो मातृका यादवलाई नयाँ जिम्मेवारी, दुई केन्द्रीय सदस्यको सरूवा

काठमाडौं । नेकपा माओवादी केन्द्रले उपमहासचिव मातृकाप्रसाद यादवलाई नयाँ जिम्मेवारी दिएको छ । महासचिव देव गुरुङले परिपत्र जारी गर्दै यादवलाई सम्पर्क समन्वय प्रदेशको इञ्चार्जको जिम्मेवारी दिएको जानकारी गराएका हुन् ।

यादवले यसअघि भारत प्रवासको जिम्मेवारी अस्वीकार गरेका थिए । यस्तै माओवादीले दुई केन्द्रीय सदस्यको सरुवा गरेको छ । केन्द्रीय सदस्य महेश्वर दाहाल ४ महिने जनतासँग माओवादी पार्टी विशेष रुपान्तरण अभियानमा बागमती प्रदेशमा खटिएकाले सोही प्रदेशमा सरूवा गरिएको परिपत्रमा उल्लेख छ ।

वैकल्पिक केन्द्रीय सदस्य मोहनमान स्वाँरले आफू श्रीमतीको उपचारमा लामो समयसम्म क्यानडामा रहनुपर्ने कारण देखाइ सरुवा माग गरेकाले युरोप-अमेरिका प्रवास समन्वय प्रदेशमा सरूवा गरिएको छ ।

महासचिव गुरुङले माओवादी र नेपाल समाजवादी पार्टीबीच एकता गर्ने सहमति भएको पनि जानकारी गराएका छन् । डा. बाबुराम भट्टराई माओवादीसँग एकता गर्न तयार नभएपछि अर्का अध्यक्ष महेन्द्रराय यादव पक्षका नेताहरुले शनिबार एकताको सहमति गरेका थिए ।