रुम्जाटारको रनवेमा रोमान्टिक दयाहाङ-आँचल

काठमाडौं । भ्यानेटाइन डेको अवसर पारेर रामबाबु गुरुङ निर्देशित ‘डिग्री माइलाः एमए थर्ड क्लास’को रोमान्टिक पोस्टर रिलिज भएको छ । पोस्टरसँगै सिनेमाको टिजर सार्वजनिक मितिसमेत सार्वजनिक गरिएको छ ।

सिनेमाको पहिलो टिजर यही फागुन ७ गते रिलिज हुनेछ । सार्वजनिक पोस्टरमा दयाहाङ राई तथा आँचल शर्मालाई रुम्जाटार विमानस्थलको रनवेमा रोमान्टिक अन्दाजमा देख्न सकिन्छ ।

सेतो कुर्तामा रातो सलमा सजिएकी आँचलले दयालाई प्रेमिल नजरले हेरिरहेकी छिन् भने दयाको पनि उस्तै भावमा देखिएका छन् । सिनेमा नयाँ वर्षमा रिलिज हुनेछ ।

बाँसुरी फिल्मसको ब्यानरमा निर्माण भएको यो सिनेमाले थर्ड डिभिजनमा मास्टर डिग्री पास गरेका एक शैक्षिक बेरोजगारको कथा पेस गर्छ ।

सिनेमाले ‘डिग्री माइला’को माध्यमबाट बेरोजगारीसँगै नेपाली समाजको चित्र पस्किनेछ । अभिनेता दयाहाङको निर्देशनमा केही वर्षअगाडि नाटकसमेत प्रदर्शन भइसकेको छ ।

सिनेमामा दयाहाङका अलावा आँचल शर्मा, विजय बराल, माओत्से गुरुङ, बुद्धि तामाङ, प्रकाश घिमिरेलगायतको अभिनय रहेको छ ।

सिनेमाले ‘किन चाउरिस मरिच आफ्नै रागले’ भन्ने चर्चित नेपाली उखानलाई आफ्नो ट्यागलाइन बनाएको छ । सिनेमा आगामी नेपाली नयाँ वर्षमा रिलिज हुनेछ ।