‘पीताम्बर’मा सुपुष्पा भट्ट अनुबन्धित

काठमाडौं । कृषा चौलागाईंको निर्देशन रहने ‘पीताम्बर’ सिनेमामा अभिनेत्री सुपुष्पा भट्ट अनुबन्धित भएकी छन् । प्रदीप खड्का शीर्ष भूमिकामा देखिने यो सिनेमामा यसअघि नै अभिनेत्री आँचल शर्मा र सुरक्षा पन्त अनुबन्धित भइसकेका छन् ।

सरस्वती पूजाको दिन पारेर आज सिनेमाको शुभ साइत गरिएको छ । दुई चरणको सुटिङ तालिका रहेको सिनेमा आगामी हप्ताबाट फ्लोरमा जानेछ ।

पहिलो चरणमा १५ दिनको सुटिङ तालिका रहेको छ । पुरुषोत्तम प्रधानको छायांकन रहने सिनेमामा सौगात मल्ल, अनुप विक्रम शाही, आँचल शर्मा, सुरक्षा पन्त, सुपुष्पा भट्ट, प्रमोद अग्रहरी, दिव्य देव, कामेश्वर चौरासियाँले अभिनय रहनेछ ।

केपी फिल्म्सले पुरुषोत्तम प्रधान फिल्म्ससँग सहकार्य गरेको सिनेमालाई पुरुषोत्तम प्रधानले खिच्नेछन् । सिनेमाको निर्मातामा विशाल चौलागाईँ छन् । निर्मात्री तथा निर्देशक कृषाको ‘ऐँचो पैँचो’ पश्चात् दोस्रो निर्देशकीय सिनेमा हो ।

सिनेमामा प्रदीप एक्सन भूमिकामा देखिनेछन् । प्रदीप भारद्वाजको लेखन रहेको सिनेमालाई निर्देशक चौलागाईँले लार्ज स्केल बनाउँदैछिन् । ५ करोड बजेट अनुमान गरिएको सिनेमाको तराईका विभिन्न ठाउँहरूमा छायांकन हुनेछ ।