एसिड पीडितहरूको कथा अब चलचित्रमा, ओलीले शुभमुहूर्त गर्ने

काठमाडौं । तेजाब आक्रमणबाट पीडित किशोरी र महिलाहरूका पीडा र जीवन कथालाई अब चलचित्रको पर्दामा देखाइने भएको छ ।

कलाकार रमित ढुंगाना लगायतको टीमले एसिड पीडितहरूको कथामा आधारित चलचित्र निर्माण गर्ने भएको हो ।

चलचित्रको शुभमुहूर्त एमाले अध्यक्ष केपी शर्मा ओलीले आज गर्ने भएका छन् ।

ओली प्रधानमन्त्री भएको बेला एसिड आक्रमणकारीहरूलाई कडा सजाय गर्ने कानून ल्याएको र पीडितहरूलाई राहत र क्षतिपूर्तिको व्यवस्था गरेकाले ओलीको हातबाट चलचित्रको शुभमुहूर्त गर्न लागिएको निर्माण टीमले जनाएको छ ।

केही समय अघि मात्रै ओलीले एमाले केन्द्रीय कार्यालयमा देशभरका एसिड आक्रमणबाट पीडितहरूलाई भेला गरेर विशेष कार्यक्रम समेत गरेका थिए ।