चलचित्र ‘जिग्री’ को टिजर सार्वजनिक, लुट स्टार पाण्डेदेखि पशुपति राईसम्म – Nepal Press

चलचित्र ‘जिग्री’ को टिजर सार्वजनिक, लुट स्टार पाण्डेदेखि पशुपति राईसम्म

काठमाडौं । अभयराज बराल र आकाश मगरको मुख्य भूमिका रहेको चलचित्र ‘जिग्री’को टिजर सार्वजनिक गरिएको छ । करिब १ मिनेट लामो टिजरमा दुई युवाले जीवनमा भोग्नु पर्ने उल्झनलाई रमाइलो ढङ्गले प्रस्तुत गरिएको छ।

टिजरमा मुख्य पात्रका अलावा ‘लुट’ चलचित्रमा पाण्डे नामले परिचित सुशीलराज पाण्डेदेखि थिएटरका पशुपति राईसम्मलाई देखाइएको छ । यसअघि नै चलचित्रको पोस्टर सार्वजनिक गरी फागुन ४ गतेलाई प्रदर्शन मिति तोकिएको छ ।

चलचित्र ‘जिग्री’ कमेडी, क्राइम र एक्सन ड्रामामा आधारित छ । चलचित्रलाई आकाश मगरले निर्देशन गरेका हुन् । चलचित्रमा मुख्य कलाकारहरू सँगै सुप्रिया राना, रोशन सुवेदी, जीवन बराल, वासुदेव खनाल, नवीन लम्साल, केदार श्रेष्ठ, दिवाकर घिमिरे, सुशीला लक्ष्मी महर्जन, मनिष व्याञ्जु, स्नेहा रसाइली, अर्जुन पौडेल, शंकर भण्डारीलगायतको अभिनय रहेको छ ।

‘जिग्री’ वर्तमान समयको आम दुई नेपाली युवाहरूको कथा हो । ती युवाहरूले महँगी र अभावमा पिल्सँदै काठमाडौंमा टिकेर बस्न गरेको सङ्घर्ष चलचित्रको मुख्य विषयवस्तु रहेको छ ।

सुस्केरा आर्ट्सको प्रस्तुति तथा निर्माण र लोकल सिनेमाको निर्माण सहकार्य रहेको चलचित्रका कार्यकारी निर्माता कुसुम थापा मगर हुन् । चलचित्रको निर्माण भने कुमार श्रेष्ठले गरेका छन् । चलचित्रमा छायाङ्कन सुमित भट्ट र सोमित माझी, सम्पादन र कलर सरुन मानन्धर, ध्वनि परिकल्पना र मिश्रण किशोर आचार्य, प्रोडक्सन डिजाइन आकी थेक्पा, सङ्गीत सुवास पौडेल र भास्कर स्वाँर, कास्टिङ निर्देशक केदार श्रेष्ठ र भिएफएक्स लुज राजभण्डारीको रहेको छ । चलचित्रको वितरण सुस्केरा आर्ट्सले गर्नेछ ।


प्रतिक्रिया

Leave a Reply

Your email address will not be published. Required fields are marked *