रुसी सेनामा जाने युवाबारे प्रधानमन्त्रीको टिप्पणी- जागिर खाने नाममा जहाँ पायो त्यहीँ जाने प्रवृत्ति राम्रो भएन (भिडिओ) – Nepal Press

रुसी सेनामा जाने युवाबारे प्रधानमन्त्रीको टिप्पणी- जागिर खाने नाममा जहाँ पायो त्यहीँ जाने प्रवृत्ति राम्रो भएन (भिडिओ)

'रुसमा वा युक्रेन लडाइमा नेपालीहरू रहेको बारेमा सरकार गम्भीर र संवेदनशील छ, नेपालीहरूलाई फिर्ता ल्याउन र मृतकका परिवारलाई क्षतिपूर्ति दिलाउन सरकार प्रयासरत छ'

काठमाडौं । प्रधानमन्त्री पुष्पकमल दाहाल प्रचण्डले रुस युक्रेन युद्धमा रहेका नेपालीहरूलाई फिर्ता ल्याउनका लागि सरकारले प्रयास गरिरहेको बताएका छन् ।

त्रिभुवन अन्तर्राष्ट्रिय विमानस्थलमा पत्रकारहरूसँग कुरा गर्दै प्रधानमन्त्री प्रचण्डले रुसलाई कूटनीतिक नोट पठाएर सबै कुरा भनिसकेको बताए । युगाण्डामा रुसी उप विदेशमन्त्रीसँग भेट गरेर नै नेपालीहरूलाई फिर्ता पठाइदिन आग्रह गरिएको उनले बताए ।

उनले भने, ‘हाम्रो देशको सम्झौता भएका भारत र बेलायत बाहेक अन्य कुनै ठाउँमा पनि नेपाली सेनालाई भर्ना गरिँदैन भन्ने कुरा छ ।

परराष्ट्रमन्त्रीले कूटनीतिक नोट पठाइसक्नुभएको छ । पटक पटक कुरा पनि भएको छ । युगाण्डामा रुसका उप विदेशमन्त्रीसँग भेटेर नै फिर्ता पठाइदिनुपर्‍यो भनेर कुरा भएको छ । मारिएकाहरूको क्षतिपूर्तिको विषयमा पनि कुरा भएको छ ।

उनले जागिर खाने नाममा राज्यको नीति र संविधानको मर्म विपरीत जहाँ पायो त्यहीँ जाने प्रवृत्ति रोकिनुपर्ने पनि बताए ।

उनले भने, ‘जहाँ पायो त्यही जागिर खाने नाममा राज्यको नीति, संविधानको मर्म विपरीत जहाँ पनि जाने । अझ बाटो छलेर जाने यो तरिका भएन ।’

अहिले रुस र युक्रेनसँग कुरा भइरहेको भए पनि उनीहरूले कति प्रेसरमा नेपालको कुरा सुन्छन् भन्ने कुरा महत्त्वपूर्ण भएको बताए ।

सरकारले मात्रै गरेर नहुने उल्लेख गर्दै उनले भने, ‘यसका लागि हामी सबैले आफ्नो तर्फबाट गर्नुपर्छ । सरकारले मात्रै गर्ने भए सरकारले पठाएको पनि होइन । सरकारले भन्ने बित्तिकै रुसले मान्दिहाल्ने कुरा पनि छैन । हामी सबैको साझा र लगातारको प्रयासले परिणाम निकाल्नुपर्छ ।’

प्रचण्डले ताइवान चीनको अंग भएको विषयमा नेपाल सरकार प्रष्ट रहेको पनि बताएका छन् । एक चीन नीति प्रति नेपाल प्रतिबद्ध रहेकाले ताइवान चीन भन्दा अलग हो भन्न नहुने उनले बताए ।

उनले भने, नेपाल एक चीन नीति प्रति प्रतिबद्ध छ । ताइवान पनि चीनकै अंग हो भन्ने हाम्रो नीति सुरुबाट नै हो । एक चीन नीति मानिसकेपछि ताइवान अलग हुनुपर्छ भन्ने हुँदैन ।’


प्रतिक्रिया

Leave a Reply

Your email address will not be published. Required fields are marked *

सम्बन्धित खवर