भारतीय सैनिक फिर्ता प्रक्रियामा भारत र माल्दिभ्सको ‘कोर ग्रुप’ वार्ता सुरु

काठमाडौं । माल्दिभ्समा रहेका भारतीय सैनिकहरुलाई भारत फर्काउने वार्तामा भारत र माल्दिभ्स सहभागी भएका छन् । गत नोभेम्बरमा चुनाव जितेर आएका राष्ट्रपति महोमद मैजूको ‘इण्डिया आउट’ नारा अन्तरर्गतको भारतीय सैनिक फिर्ता गर्ने वार्ता प्रक्रिया सुरु भएको छ ।

माल्दिभ्सको अटोल टाइम्सका अनुसार वार्ता माल्दिभ्सको राजधानी मालेमामा आइतबार सुरु भएको छ । दुई देशका ‘कोर ग्रुप’को वार्ता सुरु भएको अटोल टाइम्सले उल्लेख गरेको छ । कोप २८ को भेलामा सहभागी भएका मैजू र भारतीय प्रधानमन्त्री मोदीबीचमा कोर ग्रुप बनाएर भारतीय सैनिक फिर्ताको प्रक्रिया सुरु गर्ने बारेमा दुबईमा छलफल भएको थियो ।

त्यही छलफलको नतिजाको रुपमा आज भएको वार्तालाई लिइएको छ । वार्तामा माल्दिभ्सका तर्फबाट सेनापति अब्दुल्ला फायेज र भारतका तर्फबाट उच्च आयुक्त मुनुमहावार सहभागी भएका छन् । दुई देशबीचमा भएको रणनीतिक वार्ताको अघिल्लो दिन माल्दिभ्सका राष्ट्रपति महोमद मैजूले भारत लक्षित चर्को अभिव्यक्ति दिएका थिए ।

उनले माल्दिभ्स सानो देश छ भन्दैमा हेप्ने लाइसेन्स नहुने बताएका थिए । चीनको राजकीय भ्रमण सकेर स्वदेश ओर्लिएपछि विमानस्थलमा पत्रकारहरुसँग कुरा गर्दै मैजूले यस्तो बताएका हुन् । बीबीसीका अनुसार हाल माल्दिभ्समा सामुद्रिक गस्ती र उद्धारको लागि ७७ भारतीय सैनिकहरु रहेका छन् ।

माल्दिभ्सको मिडिया ‘द सनका अनुसार माल्दिभ्सले भारतलाई मार्च १५ भित्र आफ्ना सैनिक फिर्ता लान आग्रह गरेको छ ।