सुरक्षा पन्तको डेब्यू नाटक भारत रंग महोत्सवमा देखाइने

काठमाडौं । विजया कार्कीको निर्देशन रहेको नाटक ‘क्लेशाः’ २३ औं भारत रंग महोत्सवका लागि छनोट भएको छ । भारतको नेसनल स्कुल अफ ड्रामा (एनएसडी) ले आयोजना गर्ने महोत्सवमा यो नाटक मञ्चन हुने भएको हो ।

यसका लागि ‘क्लेशा’ को टीम आगामी फागुन २ मा दिल्ली जाने भएको छ । त्यसअघि नेपाली दर्शकबीच पुनः यो नाटक मञ्चन गराउने तयारी गरिएको छ । निर्माण टीमले नाटकको रिहर्सल पनि सुरु गरिसकेको निर्देशक विजया कार्कीले जानकारी दिए ।

नेपालमा सन् २०१९ मा मञ्चनमा आएको यो नाटकले २०२२ कै महोत्सवमा सहभागी हुन आवेदन दिएको थियो । छनौट पनि भएको थियो । तर कोरानाका कारण महोत्सव नै सर्यो ।

‘पहिलो लकडाउनपछि हामीले आवेदन पठाएका थियौं । तर छनोट भएर पनि जान पाएनौं । अब भने हामी दिल्ली जाने निश्चित भएको छ’, उनले भने । प्रतीक्षा कट्टेलको लेखन रहेको यो नाटकमा रामायणको कथालाई फरक तवराबाट वाचन गरिएको छ । क्लेशा अभिनेत्री सुरक्षा पन्तको डेब्यू नाटक हो ।

नाटकमा पन्तसँगै सरिता गिरी, रोश्नी कार्की, सबिना थापा, स्वप्निल घिमिरे, रुजा राउत, सुदीप खतिवडा, रिजोन परियार, उमेश तामाङ, अनुप न्यौपाने, केदार श्रेष्ठ, रुपक खरेल, कुशल पाण्डे, सन्दीप श्रेष्ठ, सुजन खतिवडा, विजय बराल,संयोग गुरागाईं, विकाश जोशी र मिलन कार्की छन् ।