शिक्षणको भाषा विद्यालयले नै छनोट गर्न पाउनुपर्ने व्यवस्थापन समिति महासंघको माग (भिडिओ)
![](https://www.nepalpress.com/wp-content/uploads/2020/11/nepalpress-logo-n.png)
![](https://www.nepalpress.com/wp-content/uploads/2024/01/Gunaraj-Moktan.jpg)
काठमाडौं । सामुदायिक विद्यालय व्यवस्थापन समिति महासंघले शिक्षणको भाषा सम्बन्धित विद्यालयको निर्णय बमोजिम गरिनुपर्ने बताएको छ ।
आइतबार प्रतिनिधि सभा अन्तर्गतको शिक्षा, स्वास्थ्य तथा सूचना प्रविधि समितिको बैठकमा महासंघका प्रतिनिधिहरुले विद्यालय शिक्षा विधेयकको संशोधनको सम्बन्धमा धारणा राख्दै यस्तो बताएका हुन् । उनीहरुले प्रस्तावित विद्यालय शिक्षा विधेयकमा गणित, विज्ञान र कम्युटर अंग्रेजी भाषामा पढाउनुपर्ने उल्लेख गरिएको भन्दै सबै विद्यालयमा यो प्रावधान लागू गर्नु नहुने बताए ।
बैठकमा बोल्दै सामुदायिक विद्यालय व्यवस्थापन समिति महासंघका अध्यक्ष गुणराज मोक्तानले विद्यालयमा कुन भाषामा शिक्षण गराउने भन्ने कुरा अभिभावकहरुसँगको सल्लाहमा विद्यालयले टुंग्याउनुपर्ने बताए ।
उनले भाषाका कारण गणित र विज्ञानमा विद्यार्थीहरुको सिकाइ कमजोर बन्ने अवस्था आउन दिनु नहुने बताए । उनले भाषाको विषय विद्यालय स्वयंले निर्णय गर्न पाउने व्यवस्था गर्नुपर्ने बताए ।
त्यस्तै, सरकारको अनुदानले पूर्णरुपमा विद्यालय सञ्चालन गर्न नपुगेको अवस्थामा अभिभावकहरुसँग आर्थिक साझेदारी गर्न सकिने व्यवस्था गर्नुपर्ने पनि बताए ।
विद्यालयको प्रधानाध्यापक गाउँपालिकाले नियुक्ति गर्नसक्ने व्यवस्था गर्नुपर्ने र नियुक्ति कार्यपालिकाले नगरी सोझै प्रमुख प्रशासकिय अधिकृतले गर्नसक्ने व्यवस्था गर्नुपर्ने बताए । कार्यपालिकाले प्रअ नियुक्ति गर्दा राजनीतिक हस्तक्षेप हुने उनको भनाइ छ ।
उनले विद्यालय व्यवस्थापन समितिको अध्यक्ष अभिभावकहरु मध्येबाटै तोकिनुपर्ने बताए । सामुदायिक विद्यालयहरुलाई सार्वजनिक विद्यालय नभनी सामुदायिक विद्यालय नै भनेर नामाकरण गर्नुपर्ने उनको भनाइ छ ।
यस्तो नाम राखिएमा समुदायले अपनत्व महसुस गर्ने उनले बताए । उनले विद्यालय व्यवस्थापन समितिसँगको परामर्शमा मात्रै शिक्षक सरुवा हुने व्यवस्था गर्नुपर्ने बताए । उनले ऐनमा विद्यालय व्यवस्थापन महासंघको पनि व्यवस्था हुनुपर्ने माग गरे ।