रुपान्तरण अभियानबारे माओवादीको समीक्षा- जनतामा आशाको झिल्को देखियो, अब नयाँ ढंगले बढ्छौं (भिडिओ)

काठमाडौं । नेकपा माओवादी केन्द्रले जनतासँग माओेवादी विशेष रुपान्तरण अभियान सफल भएको दाबी गरेको छ ।

चार महिने अभियान सम्पन्न भएपछि आयोजित पत्रकार सम्मेलनमा बोल्दै उपाध्यक्ष तथा प्रवक्ता अग्निप्रसाद सापकोटाले पार्टीको संगठन तल्लो तहबाटै चलायमान भएको बताए ।

उनले भने, ‘जनतालाई माओवादी चुनावमा मात्रै होइन अरु बेलामा पनि आउने रहेछन् भन्ने परेको छ । आशाको झिल्को देखिएको छ, संगठन बनेका ठाउँमा सक्रिय भएका छन् नभएका ठाउँमा बनेका छन् । केही पलायन भएपछि अभियानको क्रममा उल्लेख्य संख्यामा पार्टी प्रवेश गरेका छन् ।’

उनले अभियानको क्रममा पार्टीभित्र, जनवर्गीय संगठन, मोर्चाभित्रका अन्तरविरोधहरू सतहमा आएर समस्या समाधानको जवरजस्त आधार तय भएको बताए ।

सापकोटाले भने, ‘हामीले विधान, नियमावलीअनुसार चल्नुपर्छ भन्ने माग छ । आन्तरिक निर्देशनअनुसार चल्नुपर्छ भन्ने कुरा उठाएका छन् । त्यसैले कहाँ कमी भयो कसले माग गर्‍यो भन्ने मूल्यांकनको आधार तयार भएका छन् । हामीलाई पनि नयाँ ढंगले जान सजिलो भएको छ ।’

उनले पालिकास्तरबाटै अभियानको प्रतिवेदन लेख्ने काम भइरहेकाले सबैको आफूहरू बैठक राखेर समीक्षा गर्ने बताए । जनताले भ्रष्टाचारविरुद्ध सरकारले थालेको अभियानलाई अझ सशक्त रूपमा गम्भीरतासाथ अगाडि बढाउन सुझाव आएको माओवादीको भनाइ छ ।

प्रवक्ता सापकोटाले भने, ‘अभियानको क्रममा जनताले पहिला माओवादीको स्पष्ट दृष्टिकोण थियो त्यो संस्कार र संस्कृतिप्रति अहिले उदासिन भएको हो कि भन्ने प्रश्न राख्नुभएको छ ।’