भाजपाको प्राथमिकता नेता होइन जात – राजस्थानमा ‘लो प्रोफाइल’ ब्राम्हण भजनलाल बने मुख्यमन्त्री

नयाँ दिल्ली । भारतीय जनता पार्टीले पार्टीभित्र र बाहिरका सबैलाई आश्चर्यचकित पार्दै राजस्थानको मुख्यमन्त्रीमा लो प्रोफाइल ब्राम्हण विधायक भजनलाल शर्मालाई अघि सारेको छ ।

केन्द्रीय रक्षामन्त्री राजनाथ सिंहको उपस्थितिमा बसेको विधायक दलको बैठकले बसुन्धरा राजे सिन्धिया,दिया कुमारी,बाबा बालकनाथलगायत चर्चित र लोकप्रिय हस्तिहरुलाई पाखा लगाउँदै पहिलोपटक विधायक बनेका भजनलाललाई मुख्यमन्त्री दलको नेता चयन गरेको हो । भजनलालले यसपाली पहिलोपटक टिकट पाउँन समेत निकै पापड बेल्नुपरेको थियो । तर ब्राम्हण समुदायको मत आगामी निर्वाचनमा आफूतिर तान्न नरेन्द्र मोदी र अमित शाहले भजनलाल शर्मालाई मुख्यमन्त्री बनाएको चर्चा छ ।

यसअघि छत्तिसगढ र मध्य प्रदेशमा आदिवासीलाई मुख्यमन्त्री बनाएको भाजपाले राजस्थानामा ब्राम्हणलाई अघि सारेर उत्तर भारतको जनमत आगामी आम निर्वाचनमा आफूतिर पार्न खोजेको विश्लेषण गरिएको छ । हालै भएका ५ प्रदेशको निर्वाचनमा भाजपाले मध्य प्रदेश,राजस्थान र छत्तिसगढमा बहुमत ल्याएको छ । यसपटक भाजपाले मुख्यमन्त्रीमा सिनियर र प्रभावशाली नेताहरुलाई पाखा लगाएर जातीय समुदायलाई लक्षित गर्दै लो प्रोफाइल नेतालाई मुख्यमन्त्री बनाएको छ । मुख्यमन्त्रीकी एक सशक्त दाबेदार राजकुमारी दियाकुमारीलाई उप मुख्यमन्त्री बनाइएको छ ।