उद्योग वाणिज्य संघको चिट्ठा कार्यक्रम : ३ वर्षका बालकले पाए मोटरसाइकल

डोटी । डोटी उद्योग वाणिज्य संघले आयोजना गरेको चिट्ठा उपहार कार्यक्रम ‘लक्ष्मीको नजर कसलाई ?’ मा ३ वर्षीय बालक सारांश भट्ट मुख्य विजेता वनेका छन् ।

आइतबार दिपायल पिपल्लामा खोलिएको चिट्टाबाट दिपायल सिलगढी नगरपालिका–५ पुन्नाका सारांशले १५० सिसीको बजाज पल्सर मोटरसाइकल जितेका हुन् । उनको चिट्ठा नम्बर ४७४ रहेको छ ।

विजया दशमी, शुभ दीपावली तथा छठ पर्व–२०८० को उपलक्ष्यमा खेलाइएको चिट्ठा उपहार कार्यक्रममा सारांशका बुवाले छोराको नाममा चिट्ठा काटेका थिए ।

चिट्ठा कार्यक्रममा शिखर नगरपालिका–१० का विक्रम नाथ दोस्रो भएका छन् । उनले ‘सामसुङ ग्यालेक्सी एजिरोफोरएस’ मोबाइल जितेका छन् । त्यस्तै, तेस्रो भएका शिखर नगरपालिका–२ मुडेगाउँका ऋषिराज जोशीले १० हजार रुपैयाँ नगद उपहार प्राप्त गरेका डोटी उद्योग वाणिज्य संघका अध्यक्ष विक्रम साउँदले जानकारी दिए ।

कार्यक्रममा १० जनाले सान्त्वना उपहार पाएका छन् । सान्त्वना उपहार पाउनेहरूमा दिपायल सिलगढी नगरपालिका अनुजसिंह ठकुरी, सुनिता तिरुवा, वैष्णवी भुर्जी, धन बहादुर बादी, पदम देउवा, कृष्ण भण्डारी, दिनेश भण्डारी र सागर जोशी रहेका छन् ।

यस्तै, पूर्वीचौकी गाउँपालिका इसान खड्का र बोगटान फुड्सिलका तेज सम्राट बोहरा रहेका छन् ।

चिट्ठा प्रतियोगिताका लागि १ हजार ५ सय कुपनमध्ये १ हजार ४ सय बिक्री भएको अध्यक्ष साउँदले बताए ।