रास्वपा संसदीय दल र केन्द्रीय समितिको बैठक बस्दै, भूकम्पदेखि महाधिवेशनसम्म एजेण्डा

काठमाडौं । राष्ट्रिय स्वतन्त्र पार्टी (रास्वपा)को संसदीय दल र केन्द्रीय समितिको संयुक्त बोलाएको छ। पार्टी मुख्यालय वनस्थलीमा दिउँसो १ बजे बस्नेगरी बैठक बोलाएको हो।

बैठकमा जाजरकोट र रुकुपपश्चिममा गएको भुकम्प प्रभावित क्षेत्रमा भएका उद्धार, राहत र पुनस्र्थापनाबारे छलफल हुने उपसभापति डिपी अर्यालले बताए।

उनले भने, पार्टी सभापतिज्यू पनि प्रभावित क्षेत्रबाट फर्किनुभएको छ। उहाँले त्यहाँको अवस्था र पार्टीको तर्फबाट भएका कामबारे ब्रिफिङ गर्नुहुन्छ। र, अब कसरी अगाडि जाने भन्ने बिषयमा पनि केही निर्णय हुन्छ।

उनले बैठकमा पार्टीको महाधिवेशनको बिषयमा पनि छलफल हुने बताए। मंसिरमा गर्ने भनिएको महाधिवेशनको विधिलगायतको बिषयमा पनि छलफल हुने उनले बताए।

रास्वपाले यसअघि पार्टीको बैठक मधेश प्रदेशमा गर्ने तयारी गरेको थियो। तर, भूकम्पपछि स्थगित भएको बैठक आज काठमाडौंमै बस्न लागेको हो।