पशुपति प्रसाद २ ‘भष्मे डन’ बिहानदेखि राति सम्मकै शोमा दर्शकको चाप, हल पुगेर कलाकारले दिए धन्यवाद

काठमाडौं । आज शनिबारबाट प्रदर्शनमा आएको सिनेमा पशुपति प्रसाद २ भष्मे डनले बक्सअफिसमा बम्पर व्यापारको सुरुवात गरेको छ । सिनेमा बडादशैंको फूलपातीको अवसर पारेर तीन सयबढी स्क्रिनबाट प्रदर्शनमा आएको छ । अधिकांश हलका अनलाइन साइटमा हेर्दा बिहानदेखि राति १० बजेसम्मका शोमा दर्शकको चाप उच्च देखिएको छ ।

शनिबार बिहानी शोबाटै हाउस फुलका साथ सिनेमा हर्ने दर्शकको भिड हलमा देखिएको छ । नेपाली सिनेमामा यस्तो संयोग निकै कम सिनेमाले मात्रै पाउने गर्छन् । सिनेमाको निर्माण टिम शनिबार बिहानी शोबाट नै कलाकार विपिन कार्की, सौगात मल्ल, स्वस्तिमा खड्का, लेखक तथा निर्माता खगेन्द्र लामिछाने र निर्देशक दिपेन्द के खनाल आज दिनभर राजधानीका विभिन्न हलमा पुगेर दर्शकसँग साक्षात्कार गरेको थियो ।

लेखक तथा निर्माता खगेन्द्र लामिछानेले दर्शकको उच्च साथ पाएसँगै हिजोसम्म मनमा भएको डर हटेको बताएका छन् । सिनेमालाई दर्शक तथा समीक्षकले सिनेमा रुचाउनु भएको छ । दर्शकबाट सिनेमाको सस्पेन्स पाटोलाई निकै मन पराएको आफुहरुले पाएको भनाई उनको छ ।

अभिनेत्री स्वस्तिमा खड्काले आफुले अहिलसम्म सिनेमा हेर्न नपाएको तर दर्शकबाट पाएको प्रतिक्रियाले सिनेमा हेर्न निकै आतुर बनाएको बताइन् । हल रिपोर्टको क्रममा पत्रकारले अभिनेत्री खड्कालाई दुर्गा माताको भुमिकाबारे पाएको प्रतिक्रियाका बिषयमा समेत सोधेका थिए । जवाफमा अभिनेत्री खड्काले दर्शकले दुर्गा मातालाई निकै माया गरेको भन्दै खुशी व्यक्त गरिन् । आगामी दिनमा अझै चुनौती पूर्ण भुमिकामा काम गर्न हौसला मिलेको सुनाइन् ।

अभिनेता विपिन कार्कीले पनि भष्मे डनलाई दर्शकले रुचाएकोमा सम्पूर्ण दर्शकलाई धन्यवाद दिए । आजबाट बल्ल सिनेमा रिलिज भएकाले पहिलो दिनको जस्तै साथ सर्पोट र मायाको खाँचो आगामी दिनमा पनि रहेको भन्दै भोलीका दिनमा अझै राम्रो सिनेमामा काम गर्नु पर्ने जिम्मेवारी भष्मे डनले थपेको बुझाई उनको छ ।
अभिनेत सौगात मल्लको क्यारेक्टरले पनि दर्शकबाट निकै राम्रो प्रतिक्रिया पाएको छ । अन्य सिनेमाको छायांकनले गर्दा प्रचार प्रसारमा समय दिन नपाएपनि दर्शकबाट मिलेको माया र साथ प्रति आभारी रहेको बताए ।

यस्तै, सिनेमाका निर्देशक दिपेन्द्र के खनालले शनिबार सिनेमालाई मिलेको ओपनिङ अपेक्षाकृत नै भएको बताएका छन् । सिनेमाको निर्माण घोषणा भएसँगै दर्शकमा देखिएको उत्साहआज हलमा देखिएको छ । आगामी दिनमा दर्शकमा यो उत्साह अझै बढ्ने विश्वास व्यक्त गरे ।

दर्शक साक्षात्कार गर्न कलाकारसहित निर्माण टिमले दर्शको हुटिङ पाउनुका साथै कलाकारसँग सेल्फी खिच्न चाहने दर्शकको चाप निकै देखिएको थियो । सिनेमा हेरर हलमा निस्किँदै गर्दा अधिकांश दर्शकले निर्माण टिमसँग पशुपति प्रसाद ३ को डिमाण्ड गरिरहेका थिए ।आज सिनेमा हेर्नु हुने सम्पुर्ण दर्शकलाई धन्यबाद ।आज सिनेमा नहेरेका दर्शकलाई आफ्नो नजिकको हलमा गएर सिनेमा हर्ने समेत निर्माण टिमले आग्रह गरेको छ ।

वितरक करण श्रेष्ठले शनिबार काठमाडौं उपत्यकामा मात्रै नभई देशैभरी सिनेमाले बम्पर व्यापार गरेको बताए ।