वेब सिरिज ‘लभ सुत्र’को टिजर सार्वजनिक, सब्स्क्रीप्सन लिएर मोबाइल, वेब र स्मार्ट टीभीमा हेर्न सकिने

काठमाडौं । कान्तिपुर सिनेमाजले सिरिज ‘लभ सुत्र’को टिजर र फस्टलुक सार्वजनिक गरेको छ । सार्वजनिक टिजरमा शिल्पा मास्के, विनय श्रेष्ठ, संजोग कोइराला, सजन श्रेष्ठ, संजोग रसाइली र रवीन्द्र झा फिचर्ड छन् ।

पछिल्लो समय नेपाली डिजिटल मार्केटमा ओटीटी प्लेटफर्मको आवश्यकताको चर्चा भइरहँदा कान्तिपुर फिल्म एकेडेमीले यही दशैंबाट स्ट्रिमिङ सुरु गर्न लागेको हो । ओटीटीका लागि कान्तिपुर सिनेमाजले केही हप्ता अगाडि ब्रह्माण्ड र मिस स्कार्लेटको टिजर सार्वजनिक गरिसकेको छ ।

सार्वजनिक ३७ सेकेन्डको फस्ट लुक टिजरमा रोमान्टिक लभ स्टोरी र कमेडी देख्न सकिन्छ । भी मोसन पिक्चर्स र ओएसआर डिजिटलले मिलेर बनाएको सिरिजलाई निरोज महर्जनले निर्देशन गरेका हुन् ।

बिग स्केलमा ओटीटी प्लेटफर्म आउँदा हलको पहुँच नभएका दर्शकले नयाँ नयाँ फिल्महरू हेर्न पाउने र फिल्मको डिजिटल बजार बढ्नेमा आशावादी रहेको कान्तिपुर फिल्म एकेडेमीले जनाएको छ ।

एकेडेमीका अनुसार ३०-४० मिनेटको ५ एपिसोडको यस सिरिजको ट्रेलर भने यही असोज २९ गते सार्वजनिक हुनेछ । सोही दिनबाट संसारभरबाट सब्स्क्रिप्सन लिएर मोबाइल फोन, वेब र स्मार्ट टीभीमा सिरिज हेर्न मिल्ने बताइएको छ ।