सुदूरपश्चिम क्रिकेट संघको अध्यक्षमा जोशी

काठमाडौं । सुदूरपश्चिम प्रादेशिक क्रिकेट संघको अध्यक्षमा वासुदेव जोशी चयन भएका छन् । शनिबार धनगढीमा सम्पन्न संघको दोस्रो साधारण सभाबाट जोशी सर्वसम्मत अध्यक्षमा चयन भएका हुन् ।

लामो समयदेखि क्रिकेटका गतिविधिमा सक्रिय जोशी पछिल्लो समय नेपाली राष्ट्रिय क्रिकेट टिमको छनोट समिति सदस्य थिए । जोशी डडेलधुराबाट जिल्ला प्रतिनिधि भएर प्रदेश अध्यक्षमा चयन भएका हुन् ।

त्यस्तै उपाध्यक्षमा बैतडीका रमेश बहादुर बोहरा ,सचिव कञ्चनपुरका लक्ष्मण दत्त भट्ट ,कोषाध्यक्ष डोटीका दिनेश सिंह चयन भएका छन् ।

सदस्यहरूमा हरी रेग्मी, बाबु राजा श्रेष्ठ, शेर सिंह खत्री,तेज कार्की, अनिल कुँवर,माया रावत साउँद महिला सदस्य,रमेश बहादुर चन्द,जोग बहादुर दौल्याय र आशिष कुमार खत्री चयन भएका छन् ।

क्यानको आगामी असोजमा हुने केन्द्रीय अधिवेशनका लागि सुदूरपश्चिम प्रदेशका सबै जिल्लामा अधिवेशन पुरा भइसकेको छ । उद्घाटन सत्रमा बोल्दै सुदूरपश्चिम प्रदेश सरकारका भौतिक पूर्वाधार मन्त्री प्रकाश देउवाले नेपाली क्रिकेटलाई माथि पुर्‍याउन भारतसँग सहकार्य गर्नुपर्ने बताए ।

मन्त्री देउवाले फाप्ला मैदान बनाउन आफ्नो तर्फबाट विभिन्न तह र तप्कासँग कुरा चलिरहेको र खेलग्राम समितिका अध्यक्ष सुवास साहीसँग पनि नियमित सम्पर्कमा रहेकाले छिट्टै सकारात्मक परिणाम आउने विश्वास व्यक्त गरेका थिए ।

क्रिकेट सङ्घका केन्द्रीय अध्यक्ष चतुर बहादुर चन्दले नेपालमा अरू खेल तत्काल विश्वकप पुग्न नसक्ने र क्रिकेट मात्रै पुग्ने भएको हुँदा क्रिकेटमा लगानी बढाउनु पर्ने बताएका थिए ।