कोशी प्रदेशसभाको बैठक भदौ १ गते बस्ने

विराटनगर । कोशी प्रदेशसभाको बैठक भदौ १ गते शुक्रवार दिउँसो १ बजे बस्ने भएको छ । असार १५ गते मुख्यमन्त्री हिक्मतकुमार कार्कीले विश्वासको मत फेल भएपछि सभामुख बाबुराम गौतमले अर्को सूचना जारी नभएसम्म बैठक स्थगित गरेका थिए ।

प्रदेशसभा सचिवालयका सचिव गोपालप्रसाद पराजुलीले सूचना प्रकाशित गर्दै बैठकको जानकारी गराएका हुन् । यसअघि कोशी प्रदेशसभा नियमित सञ्चालन हुन नसक्दा संसद् सचिवालयमा दर्ता भएका दुई वटा प्रतिस्थापन विधेयक निष्क्रिय बनेका छन् ।

कोशी प्रदेश मुख्यमन्त्री कार्यालयका अनुसार प्रदेश निजामती सेवा ऐन (पहिलो संशोधन) अध्यादेश, २०८० र स्थानीय सेवा (गठन तथा सञ्चालन) अध्यादेश २०८० लाई प्रतिस्थापन गर्न ल्याइएको विधेयक निष्क्रिय बनेको हो ।

सभामुख बाबुराम गौतमले पदबाट राजीनामा दिएर आर्थिक मामिला तथा योजना मन्त्री बनेका छन् । उपसभामुख सिर्जना दनुवारले अब सभा सञ्चालन गर्नेछिन् ।