किशोरको ‘इलामैको चिया बगान’ मा जंग-नग्माको प्रेम कहानी

काठमाडौं । गायक तथा संगीतकार किशोर शिवाकोटीको ‘इलामैको चिया बगान’ बोलको गीतको भिडिओ सार्वजनिक भएको छ । शिवाकोटी र बानिका प्रधानको स्वर रहेको गीतमा गायक शिवाकोटी स्वयम्, सर्वजीत राई र शिव माप्चनको शब्द सिर्जना छ । गीतमा पबिधन खालिङको एरेन्ज छ भने मिक्सिङ र मास्टरिङमा किशोर थापा छन् ।

भिडिओमा इलामको रोमाञ्चक दृश्यसँगै चिया बगानभित्र हुने रमाइला र सुखदु:खका दृश्यलाई निर्देशक कमल राईले कलात्मक शैलीमा देखाएका छन् । एक प्रेमील जोडीको रोमाञ्चक प्रेम कहानी बुनिएको भिडिओमा जंग मगर र नग्मा श्रेष्ठ गज्जबसँग खुलेका छन् ।

चियाका मुना टिप्न गएका किशोरकिशोरी प्रेममा परेको र समयक्रमले विवाह बन्धनमा बाँधिएको कथालाई भिडिओमा देखाइएको छ । फिल्मी शैलीमा तयार पारिएको यस गीतको भीडीओमा राई समुदायको संस्कृति र स्थानीय परम्परालाई पनि झल्काउने काम गरेको छ । भिडिओको छायांकन र सम्पादन योगेश दाहालले गरेका हुन् ।

रेनुका हुमागाई, दीपक राई, सुष्मा मगर, भरत मगरलगायतका कलाकारहरूको पनि भिडिओमा अभिनय छ । शिवाकोटीकै अफिसियल च्यानल केके म्यूजिकबाट भिडिओ बजारमा आएको हो ।