यी हुन् झण्डै एक क्वीन्टल सुन बरामद प्रकरणमा पक्राउ परेकाहरू – Nepal Press

यी हुन् झण्डै एक क्वीन्टल सुन बरामद प्रकरणमा पक्राउ परेकाहरू

काठमाडौं । राजस्व अनुसन्धान विभागले झण्डै एक सय किलो सुन बरामद प्रकरणमा हालसम्म ६ जनालाई पक्राउ गरेको छ । विभागका महानिर्देशक नवराज ढुङ्गानाका अनुसार उक्त प्रकरणमा मुछिएका र पोलिएका व्यक्तिको खोजी जारी छ ।

एयरपोर्ट भन्सार गेटबाट सुन बोकेको बा. २ ज २३२४ नम्बरको ट्याक्सीलाई बुधबार साँझ ६ बजे नियन्त्रणमा लिइएको थियो ।

सुन ओसारपसारमा संलग्न आरोपमा दोलखा मेलुङ गाउँपालिका-३ घर भई हाल काठमाडौं स्वयम्भू बस्ने ५३ वर्षीय रामकुमार भुजेल, मेलुङ-३ घर भई हाल काठमाडौं साँखु बस्ने २१ वर्षका दीलिप भुजेल, भोजपुर अरुण गाउँपालिका-४ भई हाल बूढानीलकण्ठ बस्ने ४९ वर्षीय हर्कराज राई र भारत घर भई हाल काठमाडौं पानीपोखरी बस्ने भारतीय नागरिक वर्ष ५३ थाप्तेन छिरिङलाई नियन्त्रणमा पक्राउ गरिएको छ । अन्य २ जनाको नाम खुलेको छैन ।

आयातकर्ता कम्पनी रेडी ट्रेडर्सले उक्त सुन मोटरसाइकल र स्कुटरको पार्टसमा हालेर कार्गो गरी ल्याएको बताइएको छ । भन्सार जाँचपास भएर बाहिरिएको झण्डै एक क्वीन्टल  सुन राजस्व अनुसन्धान विभागको टोलीले बरामद गरेको थियो । ठूलो परिमाणको सुन भन्सारबाट सहजै छुटेको विषयमा पनि जाँचपासमा संलग्न कर्मचारीमाथि अनुसन्धान सुरू भएको भन्सार विभाग स्रोतले बतायो ।

नेपालमा एकै पटक यति धेरै सुन बरामद भएको यो पहिलो घटना हो ।


प्रतिक्रिया

One thought on “यी हुन् झण्डै एक क्वीन्टल सुन बरामद प्रकरणमा पक्राउ परेकाहरू

Leave a Reply

Your email address will not be published. Required fields are marked *

सम्बन्धित खवर