गठबन्धन दलको विश्वास गुम्ने कुनै गतिविधि नगर्न कांग्रेस पंक्तिलाई खड्काको आग्रह

काठमाडौं । सरकारका कांग्रेसको नेतृत्व गरिरहेका उपप्रधान मन्त्री तथा कांग्रेस उपसभापति पुर्णवहादुर खड्काले गठबन्धनका दलहरुलाई चित्त दुख्ने र भड्किने खालका कुनै पनि गतिविधि नगर्न केन्द्रीय समितिमा आग्रह गरेका छन् ।

मंगलबार सुरु भएको केन्द्रीय कार्य समिति बैठकमा सरकारका काम कारवाहीको बारेमा प्रतिवेदन पेश गर्दै उपप्रधानमन्त्री खड्काले निकै मेहनत गरेर गुमि सकेको सत्तामा कांग्रेसलाई फर्काइएको स्मरण गराए ।

कांग्रेस सबै तहमा गठबन्धनको ठूलो दल भएकाले कांग्रेसको भूमिकाले अन्य दललाई विश्वासमा लिएर जाने वातावरण बनाउने र प्रतिपक्षलाई समेत साथमा लिएर जाने दायित्व कांग्रेसको रहेको बताए ।

खड्काले भने– प्रतिकुल अवस्थामा हामीले हाम्रो सभापतिको नेतृत्वमा एक झड्कामा भत्किएर निराशा भएको मतदाता,पार्टी पंक्तिलाई २ महिना ठूलो मेहनतका साथ नयाँ विश्वास स्थापित गरे अनि अन्यत्र अविश्वास खडा गरेर हाम्रो नेतृत्वमा जुन परिस्थिति निर्माण भएको छ यसलाई सच्याउने र सुधार्ने कुरामा लागौं । तर मेरो आग्रह छ हाम्रा गतिविधि र बोलीबाट यो राजनीतिक परिस्थिति भत्किने र बिग्रने तहमा पुग्नेगरी जान हुन्न ।

खड्काले कांग्रेसलाई सत्तामा फर्काउन ठूलो मेहनत लागेको भन्दै यसलाई बुझ्न समेत आग्रह गरे । उनले सरकारका कमि कमजोरी र मार्गदर्शनका बारेमा केन्द्रीय समितिले आवश्यक प्रस्ताव पास गर्न सक्ने बताए ।