एमाले नेतृ झाविरुद्ध साइबर ब्युरोमा उजुरी, राष्ट्रिय एकतामाथि अघात पुर्याएको आरोप
![](https://www.nepalpress.com/wp-content/uploads/2020/11/nepalpress-logo-n.png)
![](https://www.nepalpress.com/wp-content/uploads/2023/07/Picsart_23-07-18_09-01-50-063.png)
जनकपुरधाम । नेकपा एमाले नेतृ रेखा झाले नेपाली राष्ट्रिय एकतामाथि अघात पुर्याएको भन्दै नेपाल प्रहरीको साइबर ब्युरोमा उजुरी परेको छ ।
पूर्व सांसद समेत रहेकी नेतृ झाविरुद्ध राष्ट्रिय एकता अभियानका संयोजक विनय यादवले सोमबार साइबर ब्युरोमा उजुरी दिएका हुन् ।
नेतृ झा तत्कालीन अङ्ग्रेज (ब्रिटिसले जारी गरेको नक्सा) सामाजिक सञ्जाल फेसबुकमा शेयर गरेकी थिइन् । शेयर गरिएको नक्सामा नेपाल पनि ब्रिटिस शासन अधीनको दर्साएकोले नेतृ झामाथि आवश्यक कारबाहीको माग गरिएको छ ।
अभियानका संयोजक यादवले असार २७ मा प्रेस विज्ञप्ति जारी गरेर पनि नेतृ झामाथि कारबाही गर्न नेकपा एमालेका अध्यक्ष केपी शर्मा ओलीसँग माग गरेका थिए । तर सम्बन्धित पक्षले चासो नदेखाएपछि उनले साइबर ब्युरोमा उजुरी नै दर्ता गराएका छन् ।
देशद्रोही कार्य गरेको भन्दै अभियान संयोजक यादवले नेतृ झासँग विज्ञप्तिमार्फत माफी माग्न र नेपालको गौरवशाली इतिहासलाई कलङ्कित गर्ने कार्य नगर्न आग्रह पनि गरेका थिए ।