मैतीदेवीबाट पशुपतिनाथसम्म राप्रपाको धार्मिक पदयात्रा (तस्बिरहरू / भिडिओ)

काठमाडौं । राष्ट्रिय प्रजातन्त्र पार्टीले धार्मिक पदयात्रा निकालेको छ । सोमबार दिउँसो काठमाडौंको मैतीदेवीबाट पशुपतिनाथ मन्दिरसम्म भएको पदयात्रामा राप्रपाका शीर्ष नेता र कार्यकर्ता सहभागी थिए ।

राप्रपा अध्यक्ष राजेन्द्र लिङदेन, नेताहरू बुद्धिमान तामाङ, रवीन्द्र मिश्र, दीपकबहादुर सिंहलगायत पदयात्रामा उपस्थित थिए ।

शिव सृष्टि र शून्यका प्रतीक हुन् भन्ने मान्यतालाई आत्मसात् र अनुसरण गर्दै धार्मिक जागरण फैलाउने, हिन्दूराष्ट्रका पक्षमा जनमत सिर्जना गर्ने अभियान अन्तर्गत पदयात्रा गरिएको राप्रपा प्रवक्ता मोहनकुमार श्रेष्ठले बताए ।

आयातित धर्म, संस्कृति, परम्पराको अतिक्रमणबाट देशलाई जोगाउने, समान विचार भएका शक्तिहरूलाई गोलबद्ध गर्दै जाने उद्देश्यसाथ धार्मिक पदयात्रा गरिएको आयोजक नेपाल सनातन धर्म संस्कृति संगठनका अध्यक्ष पुष्पराज पुरुषले जानकारी दिए ।