नेपाललाई लायन्समार्फत विश्वभर चिनाउँनेछु : बुर्लाकोटी

काठमाडौं । लायन्स क्लबको अन्तरर्राष्ट्रिय निर्देशक पदमा नेपालका लायन बालकृष्ण बुर्लाकोटी निर्वाचित भएका छन् । अमेरिकाको बोस्टन सहरमा हालै सम्पन्न अन्तरर्राष्ट्रिय सम्मेलनबाट उक्त पदमा निर्वाचित भएका हुन् ।

विश्वका दुई सयभन्दा बढी देशमा परोपकारी सामाजिक संस्था लायन्स समाज सेवामा सक्रिय छ । लायन बुर्लाकोटी लायन्सको विश्वभरका १८ अन्तरर्राष्ट्रिय निर्देशकमध्येको एक हुन् ।

अन्तरर्राष्ट्रिय निर्देशकका रुपमा उनले सन् २०२४ सम्म आफ्नो नेतृत्व प्रदान गर्नेछन् । उनी  ‘लायन्स क्लब मल्टिपल डिस्ट्रिक ३२५’ नेपालका पूर्वचियरपर्सन’समेत हुन् । लामो समयदेखि सामाजिक सेवामा सक्रिय उनले आफ्नो नेतृत्व समयमा क्लबमा नयाँ ‘रेकर्ड’ बनाउन सफल भएका थिए ।

लायन बुर्लाकोटीले लायन्सको सय वर्षको इतिहासमा पहिलो पटक एकै कार्यकालमा एक सय क्लब खोलेर विश्व रेकर्ड बनाएका थिए । दुई हजार आठ सय ६३ ‘मेम्बर सिपग्रोथ’ तथा ‘सय एमजेएफ कन्ट्रिव्युसन’ गराउन उनी सफल भएका थिए ।

नेपाली लायन्सका सदस्य माझ भिजेर काम गरेकाले तथा देशभरका लायन्स सदस्यको मन र विश्वासका कारण आफू अन्तरर्राष्ट्रिय निर्देशक पदमा विजयी भएको उनले जानकारी दिए। क्लबको अन्तरर्राष्ट्रिय निर्देशक पदका विजयी भएपछि उनले विज्ञप्ति जारी गर्दै भने, “नेपालमा लायनिजमको विकास र विस्तारमा मेरो सक्रियता निरन्तर छ । आगामी दिनमा यो सक्रियतालाई अझ बढाउँदै नेपाललाई लायन्समार्फत संसारभर चिनाउँनेछु ।”

लायन्सको अन्तरर्राष्ट्रिय निर्देशक बनेर संसारभर नेपालको झण्डा र राष्ट्रिय गानलाई चिनाउने अभियानमा लाग्ने प्रतिबद्धता उनले व्यक्त गरे । साथै लायन्सको अन्तरर्राष्ट्रिय निर्देशक बनेपछि नेपालमा धेरै भन्दा धेरै स्थायी परियोजना ल्याउनमा भूमिका खेल्ने र बढीभन्दा बढी अवसर अन्तरर्राष्ट्रियबाट सिर्जना गर्न आफू सक्रिय हुने उनले जानकारी दिए ।