गण्डकीका सांसदको छातीमा नयाँ लोगो : हटाइयाे यी पाँच चिन्हहरु
![](https://www.nepalpress.com/wp-content/uploads/2020/11/nepalpress-logo-n.png)
![](https://www.nepalpress.com/wp-content/uploads/2023/07/Gandagi-New-Logo.jpg)
पोखरा । गण्डकी प्रदेश सभाको लोगो परिवर्तन हुने भएको छ । नियमावली मस्यौदा समितिले प्रदेश सभाको लोगो परिवर्तन गर्ने गरी प्रदेश सभा नियमावली २०८० को मस्यौदा प्रदेश सभामा पेस गरेको छ । उक्त मस्यौदामा प्रदेश सभाको लोगोमा व्यापक परिवर्तन गरिएको छ ।
हाल सांसदले लगाइरहेको लोगोमा हरियो रंगको प्रयोग धेरै गरिएको छ । नयाँ लोगोमा पहेँलो रंग प्रयोग भएको छ । गैँडा, मृग देखाएर हालको लोगोमा नवलपुरसँग जोडिएको चितवन राष्ट्रिय निकुञ्ज देखाउन खोजिएको छ ।
नयाँ लोगोमा यसअघि भएका जनवार र चरा हटाइएको छ । लोगोको रंग परिवर्तन गरिएको छ भने डाँफे, गैँडा, मृग, लालीगुराँस, नदी हटाएर लोगो बनाइएको छ ।
नयाँ लोगो प्रस्तावका लागि नियमावली मस्यौदा समिति सदस्य सुधीरकुमार पौडेलको संयोजकत्वमा उपसमिति बनाइएको थियो ।
पहिला बनाएको लोगोमा धेरै विषयवस्तु समेटिएकाले सांसदको हो कि सामाजिक संस्थाको भन्ने छुट्याउन समेत गाह्रो भएकाले नयाँ प्रस्ताव गरिएको उपसमितिका संयोजक पौडेलले जानकारी दिए ।
उक्त नियमावलीको मस्यौदालाई असार २२ गते प्रदेश सभामा प्रस्तुत गरिनेछ । उक्त नियमावली पारित भएपछि नया लोगो बनाउने प्रक्रिया सुुरु हुनेछ । अहिलेको लोगो चीनमा बनाएर ल्याइएको थियो ।
प्रदेश सभा नियमावली २०७४ लाई नयाँ र समसामयिक विषयवस्तु समेटी नयाँ नियमावलीको प्रस्ताव तयार गर्न गत फागुन १० गण्डकी प्रदेशसभा नियमावली मस्यौदा समिति गठन गरिएको थियो ।
उक्त मस्यौदा असार १८ गते सदनमा प्रस्तुत भएर असार १९ सामान्य छलफल भएको छ । सामान्य छलफलपछि संशोधनको सूचनाका लागि ७२ घन्टे समय तोकिएको छ । समितिको सभापति बिन्दुकुमार थापा छन् ।