प्रस्तावित प्रधानन्यायाधीशविरुद्ध उजुरीकर्ताको संगठित बार्गेनिङ, एक्लाएक्लै संसदीय सुनुवाइमा नजाने अडान
![](https://www.nepalpress.com/wp-content/uploads/2020/11/nepalpress-logo-n.png)
![](https://www.nepalpress.com/wp-content/uploads/2023/06/samsadiya-sunuyai-samiti-3.jpg)
काठमाडौं । प्रतिनिधिसभाको संसदीय सुनुवाइ समितिमा प्रधानन्यायाधीशका लागि सिफारिस भएका हरिकृष्ण कार्कीविरुद्ध परेको उजुरीमाथि छलफल सुरू भएको छ ।
संसदीय सुनुवाइ समितिको बैठकमा २० वटा उजुरीका २३ जना उजुरीकर्ता सम्पर्कमा आएको ज्येष्ठ सदस्य तथा समिति सभापति पशुपतिशमशेर जबराले जानकारी दिए ।
गम्भीर प्रकृतिका उजुरी मात्र प्राथमिकता दिएर छलफल गर्ने उनले बताए ।
उनले भने, ‘सामान्य र उजुरीका लागि उजुरीमात्रमा छलफल कम हुन्छ । प्रत्येक उजुरीकर्तालाई १० मिनेटको समय उपलब्ध गराइन्छ ।’
प्रस्तावित प्रधानन्यायाधीश कार्कीविरुद्ध उजुरी गर्नेहरू समूह बनाएरै संसद सचिवालयमा आएका छन् । उनीहरूले एक्लाएक्लै समितिमा नजाने भन्दै सबैलाई एकैपटक बोलाइनुपर्ने नत्र कोही पनि नजाने अड्डी कसेका छन् ।
संसदीय सुनुवाइ समितितको प्रक्रिया भने उनीहरूले भनेजस्तो छैन । प्रत्येक उजुरीकर्तालाई अलगअलग बोलाएर १० मिनेटको समय दिइने छ । तर, उजुरीकर्ताले भने संगठितरूपमै समितिसँग बार्गेनिङ गरिरहेका छन् ।
उजुरीकर्ताहरू पेशेवर र संगठित देखिएको र उनीहरुले संसदीय सुनुवाइ समितिलाई नै ‘संगठित ब्ल्याकमेल’ गर्न थालेपछि प्रधानन्यायाधीश नियुक्तिको बाटो तत्कालै खोल्ने तयारीमा समिति जुटेको हो ।