पशुपतिकाे जलहरीमा भ्रष्टाचार भएकाे मा‌ओवादी सांसदकाे आराेप, एमालेकाे आपत्ति (भिडिओ)

काठमाडौं । नेकपा एमालेले अध्यक्ष केपी शर्मा ओलीलाई लक्षित गर्दै सत्तापक्षका सांसदहरुले भ्रष्टाचार गरेको आरोप लगाएपछि आपत्ति जनाएको छ। नेकपा एमालेका प्रमुख सचेतक पदम गिरीले प्रतिनिधि सभाको बैठकमा बोल्दै आपत्ति जनाएका हुन्।

उनले भने, ‘सत्तापक्षकै लेखनाथ दाहाल भन्ने सांसदले उहाँले भन्नुभयो एमाले नेतृत्वको सरकार हुँदा ओलीज्यूले पशुपति नाथको मन्दिरमा जलहरी लगाउने भनेर सुन लगाउने भनेर पित्तल लगाएको गम्भीर आरोप यही सदनबाट लगाउनुभयो।’

नीति तथा कार्यक्रममाथिको छलफलको क्रममा दाहालले यसअघिको बैठकमा ओलीले विरोधमात्र गरेको टिप्पणी गर्दै आफ्ना पालामा भएका भ्रष्टाचारको जवाफ दिन भनेका थिए ।

उनले तथ्य र प्रमाणबिना लगाएको आरोप स्वीकार्य नहुने चेतावनी दिए। देशको मुख्य चुनौती भ्रष्टाचार बनेकाले देशलाई भ्रष्टाचार मुक्त नबनाएसम्म समृद्धिको यात्रा तय गर्न नसक्ने बताए।

उनले भने, ‘एमालेले भ्रष्टाचारका विरुद्धमा देशव्यापी अभियान छेड्छ। जनतालाई सजक बनाउनुको साथै यो संसदमा पनि निरन्तर भ्रष्टाचारविरुद्ध आवाज उठाउँछौं।’

भ्रष्टाचारको सबै फाइल खोल्ने जिम्मेवारीबाट भाग्न नमिल्ने अवस्थामा पुगिसकेको बताए।