नौ खेलाडीमा सीमित संकटासँग एपीएफ पराजित
![](https://www.nepalpress.com/wp-content/uploads/2020/11/nepalpress-logo-n.png)
![](https://www.nepalpress.com/wp-content/uploads/2023/04/sankata-club-win.jpg)
काठमाडौं । जुनियर केङ्गेको निर्णायक गोलमा ९ खेलाडीमा सीमित संकटा क्लबले सहिद स्मारक ए डिभिजन लिगमा एपीएफ क्लबलाई १-० गोलले पराजित गरेको छ ।
च्यासल रंगशालामा किकअफको समयभन्दा करिब आधा घण्टा ढिला सुरु भएको खेलको २९औं मिनेटमा पाएको पेनाल्टीमा जुनियरको गोलमा जीत निकाल्दै संकटाले तीन अंक जोड्यो ।
एपीएफका डिफेन्डर पेपेले विंगर आयुष घलानमाथि फाउल गरेपछि संकटाले पेनाल्टी पाएको थियो । सोही पेनाल्टीलाई सदुपयोग गर्दै जुनियरले गरेको गोल संकटाको जीतलाई पर्याप्त बन्यो ।
पहिलो हाफमा १-० गोलको अग्रता बनाएको संकटा दोस्रो हाफमा मनिष डाँगी र आन्द्रे बियिकले रातो कार्ड व्यहोरेपछि ९ खेलाडीमा सीमित भयो । एपीएफका विक्रम धिमालले पनि रातोकार्ड व्यहोर्दा १० खेलाडीमा समेटिएको थियो ।
त्यसमाथि संकटाले पहिलो हाफमा बनाएको अग्रतालाई खेलको अन्त्यसम्म बचाउँदै तालिकाको पाँचौं स्थानमा उक्लियो । संकटाले ९ खेलमा १५ अंक जोडेको छ । पराजित एपीएफ ९ खेलमा ११ अंकसहित तालिकाको नवौं स्थानमा छ ।