द्वन्द्वपीडित सुरक्षाकर्मीका परिवारले प्रधानमन्त्री भेटे

काठमाडौं । माओवादी सशस्त्र द्वन्द्वको क्रममा ज्यान गुमाएका सुरक्षाकर्मीका परिवारले प्रधानमन्त्री पुष्पकमल दाहाल ‘प्रचण्ड’ लाई भेटेका छन् ।

आइतबार बिहान प्रधानमन्त्री निवास बालुवाटार पुगेका उनीहरूले सत्य निरूपण तथा मेलमिलाप विधेयकमा राज्य र विद्रोही दुवै पक्षबाट पीडितलाई समान व्यवहारको प्रबन्ध गर्न, क्षतिपूर्ति र परिपूरणमा ध्यान दिन ध्यानाकर्षण गराए ।

प्रधानमन्त्रीले देशको राजनीतिक, सामाजिक रूपान्तरणको आन्दोलनका क्रममा ज्यान गुमाउने सबैप्रति आफ्नो समान सद्भाव भएको बताउँदै शान्ति सम्झौताको मर्मअनुसार पीडितका मुद्दा सम्बोधन गर्ने प्रतिबद्धता जनाए ।