सरकारले पूर्णता पाएसँगै नयाँ रेकर्ड बन्ने गरी काम गर्छौं : प्रधानमन्त्री प्रचण्ड

काठमाडौं । प्रधानमन्त्री पुष्पकमल दाहाल प्रचण्डले आज सरकारले पूर्णता पाउने बताएका छन् ।

राष्ट्रिय कर्मचारी संगठन निजामतीको महाधिवेशनलाई सम्बोधन गर्दै उनले ३ बजे मन्त्रीहरुको शपथ रहेको बताए ।

उनले भने, ‘मैले तेस्रो पटक प्रधानमन्त्रीको जिम्मेवारी लिएको करिब ९७ दिन भयो । यो बीचमा भए गरेका कामहरु तपाईंहरुले नजिकबाट हेरिरहनुभएको छ। मैले अहिले त्यसको व्याख्या गर्न सम्भव छैन । सुशासन, सामाजिक न्याय, विकास निर्माण र समृद्धिको दृष्टिकोणले केही रेकर्ड बनाउने कोसिस भइरहेको छ । त्यसको फेहरिस्त यहाँ प्रस्तुत गर्न सम्भव छैन । केही नयाँ सुरुवात गरेका छौं ।’

उनले आफ्नो तेस्रो कार्यकालमा इतिहासमा कहिल्यै नमर्ने प्रतिबद्धताका साथ योजना बनाएको बताए । ‘केही ठूला इतिहासमा कहिल्यै नमर्ने प्रतिबद्धताको साथ मैले योजना बनाउँदैछु । आज सरकारले पूर्णता पाउँदैछ । ३ बजे मन्त्रीहरुको शपथ गरिसकेपछि हाम्रो ध्यान देश निर्माणमा ऐतिहासिक रेकर्ड बनाउनुपर्ने भन्नेमा छौं’, उनले भने ।