गठबन्धनमा नेकपा एसको अडान- सबै छाडिसक्यौं, रोजेकै चार मन्त्रालय चाहिन्छ

काठमाडौं । प्रधानमन्त्री पुष्पकमल दाहाल ‘प्रचण्ड’ ले विश्वासको मत लिएलगत्तै सरकारलाई पूर्णता दिनेगरी गृहकार्य थालेका छन् । चैत ६ गते विश्वासको मत लिएलगत्तै प्रचण्डले सरकारलाई पूर्णता दिनेगरी आन्तरिक रुपमा शीर्ष तहमा छलफल गरिरहेका छन् ।

अहिले सत्ता गठबन्धनमा १० दल छन् । गठबन्धनमा सामेल भएका कति मन्त्रालय सरकारमा जान्छन् भन्ने कुरा अहिल्यै टुंगिएको छैन । तर, सरकारमा सहभागी हुँदा माधव नेपाल नेतृत्वको नेकपा एसले चार मन्त्रालयको दाबी गर्ने भएको छ ।

अब गठबन्धनमा दाबी गर्ने पहिलो पालो आफूहरूकै भएका नेकपा एसका नेता प्रकाश ज्वालाले बताए ।

उनले नेपाल प्रेससँग भने, ‘हामीले राष्ट्रपति, उपराष्ट्रपति, प्रधानमन्त्री, सभामुख र उपसभामुख सबै छाडिसक्यौं । हामीले कडै दाबी गर्छौँ । अब कति मन्त्रालय दाबी गर्ने भन्ने विषयमा पार्टीभित्र छलफल गरेर निर्णय लिन्छौं ।’

अहिलेसम्म गठबन्धनभित्र मन्त्रालयका भागबन्डाको विषयमा छलफलले प्रवेश नपाएको उनले बताए ।

‘पहिला राष्ट्रपतिको निर्वाचनमा केन्द्रित थियौं । अब उपराष्ट्रपतिको निर्वाचनपछि प्रधानमन्त्रीले विश्वासको मत लिनुहुन्छ । अनिमात्रै भागबन्डाको विषयमा प्रवेश गर्छौं’, उनले भने, ‘मन्त्रालयको भागबन्डामा सहमति भइसकेपछि मात्रै हामी सरकारलाई पूर्णता दिने प्रक्रिया अघि बढ्छ ।’

अर्का एक नेताले कम्तीमा महत्वपूर्ण आफूहरूले रोजेकै मन्त्रालय पाउनुपर्ने बताए ।

ती नेताले भने, ‘पहिला छलफलमा हामीलाई चार मन्त्रालयको कुरा भएको थियो । अहिले पनि त्यही अडानमै छौं । तर, अब गठबन्धनमा रहेका कति पार्टीहरू सरकारमा जान्छन् । त्यसमा पछि भर पर्छ ।’

गृह, अर्थ, भौतिक, परराष्ट्र जस्ता महत्वपूर्ण मन्त्रालयमा आफूहरूको पहिलो प्राथकिता रहने उनको भनाइ छ ।