विप्लव र बाबुरामसँग प्रचण्डको आह्वान- माओवादीहरू एक ठाउँमा आए नयाँ यात्रा सुरू गर्न सक्छौँ (भिडिओ)

काठमाडौं । प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्डले पूर्व माओवादीहरूलाई एक ठाउँमा आउन आह्वान गरेका छन्।

काठमाडौंमा आयोजित आइतबार शहीद तथा बेपत्ता परिवारको कार्यक्रममा नेपाल समाजवादी पार्टीका अध्यक्ष बाबुराम भट्टराई, नेपाल कम्युनिष्ट पार्टीका महासचिव नेत्रविक्रम चन्द ‘विप्लव’ लगायत अरू नेताहरूमाझ प्रचण्डले फेरि एकताबद्ध हुन अपिल गरेका हुन्।

उनले भने, ‘हामी माओवादी आन्दोलनका सबै धारका प्रतिनिधि उपस्थित भएका छौं। यो सामान्य कुरा होइन। यसले शक्तिशाली सन्देश दिन्छ। अहिले एउटा सामान्य हालमा जुटेर केही कुरा गर्दैछौँ। त्यसको महत्त्व दुरगामी र अर्थपूर्ण छ।’

उनले माओवादी शक्तिहरू एकताबद्ध हुँदा त्यसको प्रभाव जवर्जस्त प्रभाव हुने बुझेर नै प्रतिक्रियावादीहरुले विभिन्न भ्रम छरेर घेरा हाल्ने षड्यन्त्र गरिरहेकै बताए।

उनले भने, ‘हिजो हामीले जनयुद्धको अन्तिम समयमै पनि देखेकै कुरा हो। त्यसकारण अहिले एकताबद्ध हुनुपर्छ भन्ने आवश्यकता बोध गरिएको छ। यो एउटा शक्ति हो भन्ने भन्ने ठान्छु र सबै साथीहरूलाई यो विषयमा गम्भीरतापूर्वक विचार गर्न आग्रह गर्न चाहन्छु। एकचोटी माओवादीहरू एकै ठाउँमा जम्मा भएर लाखौँ जनता सडकमा उतार्ने हो भने प्रतिक्रियावादी शक्तिहरू धेरै कमजोर छन्। माओवादीले फेरि एक पटक विजयको नयाँ यात्रा सुरु गर्न सक्छ।’