राप्रपालक्षित राजकिशोरको चेतावनी- संविधानविरुद्ध बोलिरहे सदन घेर्छौं (भिडिओ)

काठमाडौं । जनता समाजवादी पार्टी (जसपा)का सांसद राजकिशोर यादवले राष्ट्रिय प्रजातन्त्र पार्टीका मन्त्रीहरुलाई कारबाही गर्न माग गरेका छन् ।

वुधबारको प्रतिनिधिसभा बैठकमा उनले संविधानविरुद्ध बोल्दै हिँड्ने मन्त्रीहरुलाई कारबाही गर्न माग गरेका हुन् । संविधानविरुद्ध बोलिरहे आफूहरू सदन घेर्ने बाध्य हुने चेतावनी समेत दिए ।

उनले भने, ‘प्रधानमन्त्रीजीले मन्त्रीहरुलाई स्पष्टीकरण सोध्छु भन्नुभएको थियो । त्यो के भयो ? यदि यही रवैया रह्यो भने हामी सदन घेर्न बाध्य हुन्छौं होइन भने यस्ता अनुशासनहीन र संविधान नमान्ने मन्त्रीलाई बर्खास्त गर्न गर्नुपर्छ ।’

संविधान नमान्ने मन्त्रीलाई प्रधानमन्त्रीले बर्खास्त गर्नुपर्ने बताउँदै उनले संघीयता कसैको कृपाले, गणतन्त्र कसैको आशीर्वाद र दाइजोबाट नआएको बताए ।

‘कसैको रहरले संघीयताविरुद्ध जान सकिँदैन । सरकार जाने, कार्यकारी जिम्मेवारीमा बस्ने अनि मन्त्री पदको दुरुपयोग गर्दै संघीयता र गणतन्त्रको विरोधमा बोल्यो भने जसपा चुप लागेर बस्न सक्दैन’, उनले चेतावनी दिए ।