प्रचण्ड सरकारमा लुम्बिनीका ५ जना मन्त्री : ३ नयाँ, २ अनुभवी

रुपन्देही । प्रधानमन्त्री पुष्पकमल दाहाल प्रचण्ड नेतृत्वको सरकारमा लुम्बिनी प्रदेशका ५ जनाले उपस्थिति जनाएका छन् । ५ मध्ये २ जना यसअघि पनि मन्त्री बनेका हुन् । ३ जना नयाँले यसपटक मौका पाएका हुन् । लुम्बिनीबाट नेकपा एमाले, नेकपा माओवादी केन्द्र, राप्रपा र जनमत पार्टीका सांसदहरु मन्त्री बन्न सफल भएका छन् ।

रुपन्देहीबाट प्रतिनिधिसभा सदस्य जितेका एमाले उपाध्यक्ष विष्णु पौडेल उपप्रधान तथा अर्थमन्त्री छन् । उनी पटक-पटक मन्त्री बनेका अनुभवी हुन् । पौडेल एमालेको नेतृत्व गर्दै दोस्रो वरियतामा सरकारमा छन् ।

उनीसँगै जनमत पार्टीका उपाध्यक्ष बर्दियाका अब्दुल खान मन्त्री बने । मन्त्रिपरिषद् विस्तार गरिँदा सञ्चारमन्त्री दाङकी रेखा शर्मा, कानूनमन्त्रीमा नवलपरासीका ध्रुवबहादुर प्रधान र अर्घाखाँचीकी  सुशीला श्रीपाली पर्यटन राज्यमन्त्री बने ।

अनुभवी विष्णु

२०५१ सालदेखि निरन्तर सांसद बनेका एमाले उपाध्यक्ष विष्णु पौडेल पटक–पटक मन्त्रीसमेत बनेका अनुभवी हुन् । प्रधानमन्त्री प्रचण्डपछिको वरियतामा उपप्रधान एवं अर्थमन्त्री बनेका उनी अर्थमा तेस्रोपटक पुगेका छन् । पौडेल रुपन्देही २ बाट लगातार चौथो पटक निर्वाचित भएका छन् ।

२०५१ सालमा पाल्पाबाट सांसद बनेका उनी त्यसपछि रुपन्देहीबाट संसदीय यात्रामा निरन्तरजस्तै छन् । २०५१ मा पाल्पा क्षेत्र नम्बर ३ बाट सांसद जितेका पौडेल २०५४ सालमा युवा तथा खेलकुदमन्त्री बनेका थिए । २०५६ मा रुपन्देही झरेका पौडेल क्षेत्र नम्बर ३ मा पराजित भए । तर, २०६४ सालदेखि सोही क्षेत्रबाट निरन्तर निर्वाचित हुँदै आएका छन् ।

यसबीचमा उनी २०६५ मा प्रचण्ड सरकारमा जलस्रोतमन्त्री बने । झलनाथ खनालको पालामा रक्षामन्त्री बने । ओली पहिलोपटक प्रधानमन्त्री हुुँदा पौडेल अर्थमन्त्री बनेका थिए । एमाले माओवादी मिलेर बनेको नेकपाको महासचिव बनेका पौडेल दोस्रोपटक ओलीको सरकार ढल्ने समयमा पुनः अर्थमन्त्री भएका थिए ।

पहिले सामान्य प्रशासन सम्हालेकी रेखा अहिले सञ्चारमन्त्री

सञ्चारमन्त्री शर्मा दाङ क्षेत्र नम्बर २ बाट एमाले महासचिव शंकर पोख्रेललाई पराजित गर्दै प्रतिनिधिसभा सदस्यमा निर्वाचित भएकी थिइन् । शर्मा यसअघि सामान्य प्रशासनमन्त्री भएकी थिइन् ।

शर्मा माओवादीबाट प्रत्यक्षतर्फ चुनाव जित्ने एक्ली महिला संसद हुन् । माओवादी केन्द्रले ८ जना महिलालाई टिकट दिएको थियो । तर, निर्वाचनमा रेखाले मात्र माओवादीको विरासत बचाउन सकिन् । तत्कालीन सत्ता गठबन्धनका साझा उम्मेदवार शर्माले पोखरेललाई जम्मा १९६ मतान्तरले हराएकी थिइन् । शर्माले २६ हजार ८७७ मत ल्याउँदा पोखरेलले २६ हजार ६८१ मत पाएका थिए ।

२०७० बाट संसदीय यात्रा सुरु गरेकी शर्मा २०७४ मा प्रतिनिधिसभामा समानुपातिकबाट निर्वाचित भएकी थिइन् । २०७२ साल कात्तिकदेखि २०७३ कात्तिकसम्म उनी सामान्य प्रशासनमन्त्री बनेकी थिइन्
।

पाँचौं प्रयासमा सांसद बन्न सफल ध्रुवबहादुर

नेपाल प्रहरीको आईजीपी बनेर राजनीतिमा आएका धु्रवबहादुर प्रधान पाँचौं प्रयासमा यसपटक प्रतिनिधिसभा सदस्य बन्न सफल भएका हुन् । राप्रपाका उपाध्यक्ष प्रधान कानूनमन्त्री बनेका छन् । २०५३ सालमा प्रधान नेपाल प्रहरीका महानिरीक्षक बनेका थिए ।

अवकाशपछि राजनीतिमा आएदेखि लगातार चुनाव लड्दै आएका उनी यसपालि पश्चिम नवलपरासी २ बाट निर्वाचित भएका हुन् । उनले  तत्कालीन सत्ता गठबन्धनका साझा उम्मेदवार कांग्रेसका प्रभावशाली नेता देवेन्द्रराज कँडेललाई  पराजित गरेका थिए ।

३५ वर्षमै मन्त्री बन्न सफल अब्दुल

बर्दियाका अब्दुल खान कम उमेरमै मन्त्री भएका छन् । खान ३५ वर्षमै मन्त्री भएका हुन् । जनमत पार्टीबाट समानुपातिक सांसद बनेका खान सो पार्टीका केन्द्रीय उपाध्यक्ष हुन् । जनमतले प्रतिनिधिसभा चुनावमा प्रत्यक्षतर्फ १ र समानुपातिकतर्फ ५ सीट जितेको थियो ।

पार्टी अध्यक्ष सीके राउत सरकारमा नजाने भएपछि उपाध्यक्ष खान गठबन्धन सरकारमा सहभागी भएका हुन् । सुरुमा विनाविभागीय मन्त्री बनेका खानलाई पछि खानेपानी मन्त्रालय दिइएकाे थियाे । तर, पार्टीले उद्याेग मन्त्रालय मागेकाे भन्दै उनले सातादिन पदभार ग्रहण गरेनन् ।

२०४३ साल भदौ १ गते बर्दियाको गुलरिया नगरपालिका- ११ ओसीपुरमा पिछडिएको समुदायको सामान्य किसान परिवारमा जन्मेका उनले स्थानीय सामुदायिक विद्यालयमा माध्यमिक तहको अध्ययन पूरा गरेका थिए । एसएलसीसम्म बर्दियामै अध्ययन गरेका खानले आईएस्सी भने टीकापुरबाट गरेका थिए । आईएस्सीपछि थप अध्ययन गर्न उनी काठमाडौं लागेका थिए ।

काठमाडौंमा अध्ययन गर्दा उनको सम्पर्क सीके राउतसँग भएको उनी निकट नेताहरु बताउँछन् । २०६९ सालमा स्वतन्त्र मधेस आन्दोलनमा लागेर लामो समयसम्म भूमिगत भएका खान आन्दोलनकै क्रममा धेरैपटक जेल परिसकेको उनका सहयात्रीहरु बताउँछन् । उनीमाथि राज्य विप्लव र सार्वजनिक मुद्दा लागे पनि हिरासतमुक्त भएपछि उनी पार्टीको राष्ट्रिय उपाध्यक्ष भएका हुन् ।

पहिलोपटक मन्त्री बनेकी श्रीपाली

पर्यटन राज्यमन्त्री सुशीला श्रीपाली अर्घाखाँचीकी हुन् । उनले २०४६ सालदेखि कम्युनिष्ट आन्दोलनमा लागेकी हुन् । २०५४ सालसम्म भारतमै रहेर माओवादी आन्दोलनमा सहभागी भएकी थिइन् । उनी २०५४ भदौदेखि नेपालमै रहेर माओवादी आन्दोलनमा लागेकी हुन् ।

अहिले माओवादी केन्द्रीय सदस्य रहेकी श्रीपालीकी श्रीमान डम्मरसिंह ठकुरी सेना समायोजनमार्फत् नेपाली सेनामा छन् । २०६८ मा उनी दलित आयोगको सदस्य भएकी थिइन् । उनी अहिले समानुपातिक सांसद हुन् ।