राष्ट्रपतिमा माओवादीको जोड- एमाले, कांग्रेससहितको राष्ट्रिय सहमति (भिडिओ)

काठमाडौं । नेकपा माओवादी केन्द्रका नेता देवेन्द्र पौडेलले राष्ट्रपति राष्ट्रिय सहमतिको आधारमा बनाउनुपर्नेमा पार्टीको जोड रहेको बताएका छन् ।

पार्टी स्थायी कमिटीको बैठकपछि सञ्चारकर्मीहरुसँग कुरा गर्दै उनले भने, ‘सबैमा सहमति जुटाएर संविधानले व्यवस्था गरेअनुरुप साझा व्यक्तित्वलाई अघि सार्न सक्यौं भने सम्भावित भोलि हुने दुर्घटना रोक्न, संविधानको रक्षा, मिश्रित बनावटको संसद त्यसलाई पाँच वर्षसम्म सकुशल लैजान राष्ट्रिय सहमतिको आधारमा अघि बढौं भन्ने हो ।’

उनले एमाले, कांग्रेससहित सबै दलहरुबाट साझा व्यक्तिलाई अघि सार्नुपर्नेमा जोड दिए । कुनै पार्टी विशेषलाई बाइपास गरेर राष्ट्रिय सहमति नहुने उल्लेख गर्दै नेता पौडेलले एमाले र कांग्रेससँग छलफल भइरहेको बताए ।

उनले आजको बैठकमा पार्टी अध्यक्ष तथा प्रधानमन्त्री पुष्पकमल दाहाल प्रचण्डबाट सामान्य रिपोटिङमात्रै भएको जानकारी दिए । बैठक भोलि बिहान ११ बजे फेरि बस्ने उनले बताए ।