मेरो प्यारो हेलम्बु – Nepal Press
कविता

मेरो प्यारो हेलम्बु

आउँछ माया उर्लिएर मेरो हेलम्बुको
काख, माथ, साथ प्यारो मेरै हेलम्बुको ।
आफ्नो भूमि प्राणसरी हिमालको छायाँ
मनैभरि सम्झना र मुटुभरि माया ।।

पाल्चाकी माई शीरमा राखी ककनीको वन
ग्रेटट्रेल घुमी मिनि पिकनिक खाउँ झैं लाग्छ मन ।
सेर्माथाङले सुसेलेको कुटुङ्साङ्ले सुन्छ
घोप्टे घ्याङ र मेलम्ची घ्याङ मित लगाए हुन्छ ।।

गर्भभित्र लुकाएर तामा सुनखानी
सञ्जीवनी बुटी पिउँछे हेलम्बुकी रानी ।
मङ्गीन गोठको धुपी सल्ला ग्याल्थुम वास्ना आउँछ
मलाई पनि चरी जस्तै उडुँउडुँ लाउँछ ।।

मरुभूमि काठमाडौंलाई अमृतरुपी पानी
आधा आधा बाँडी खान्छौं हामी कति दानी ।
गालाभरि फुलेको छ गुलाबको रङ्ग
हेलम्बुको सौन्दर्यले सबै पर्छन् दङ्ग ।।

योल्मो घाङ्रा घुम्न जाउँला, हिउँ खेल्न नि धाउँला
घाङ्युल हुँदै रमाइलो तार्केघ्याङ जाउँला ।
मेलम्ची घ्याङ् पर्खिरा’छ हाम्रै माया पाउन
हेलम्बुको काखैभरि पर्यटक भित्र्याउन ।।

तिमी झर चनौटेमा म नाकोते आउँला
सेराको धान पठाइदिउँला, आलु पैंचो ल्याउँला ।
मोही र ढिँडो खुवाइदिउँला लाङटाङ जानेलाई
रातो पाण्डा, रातो च्याउ यतै पाइन्छ दाइ ।।

कोही रोपौं स्याउ-सुन्तला, कोही नासपाती
हेलम्बुको पाखैभरि किवी रोपौं साथी ।
पहरामा फूल फुल्छ छहरामा गीत
आउनुस् हजुर लगाइहाल्नुस् हेलम्बुलाई प्रीत ।।

कोही दशैंतिहार मान्छौं, कोही ल्होसार मान्छौं
फरक भाषा, फरक संस्कार हामी आफ्नै ठान्छौं ।
अनेकतामा एकता हो हेलम्बुको शान
चिनाउनु छ संसारभरि हेलम्बुकै नाम ।।

हेलम्बु- ४, सिन्धुपाल्चोक

प्रतिक्रिया

Leave a Reply

Your email address will not be published. Required fields are marked *